“Atam universitetdə 25 il dərs deyib. Deyirdi ki, hər şey savadın üstündədir. Savadsız insan cəmiyyətin önündə olmamalıdır. Tamaşaçı qarşısında seçmə insanlar olmalıdır ki, gələcək nəsillər onlara baxaraq böyüsün”.

Bu sözləri Axşam.az-a açıqlamasında Xalq artisti Brilliant Dadaşova televiziyaların son vəziyyəti barədə söyləyib.

Sənətçi savadsız kadrların çox olduğunu desə də, ad çəkməkdən boyun qaçırıb:

“Düşmənlərimi niyə çoxaldırsınız, sonra başlayır şər-böhtan deməyə... Böhtanlardan yorulmuşam...”.

B.Dadaşova sosial şəbəkədə təhqirə məruz qaldığını bildirib:

“Heç bir sənətçiyə mənim qədər böhtan atılmayıb. Başqa dövlətlərdə əsl sənətkarı bizdə olduğu qədər təhqir etməyiblər. Niyə bizimkilər deyirəm? Çünki Azərbaycan dilində yazırlar”.

O, Xalq artisti Röya Ayxanla barışması barədə suala cavab verərkən aralarındakı münasibətə görə jurnalistləri günahlandırıb:

“Biz küsmüşdük ki, barışaq? Bilmirəm ki, siz kimi küsdürürsünüz, kimi barışdırırsınız, düzürsünüz, qoşursunuz. Bu, heç yaxşı şey deyil”.

Qeyd edək ki, Röyaya İTV-də yayımlanan “3D” verilişində “Brilliant Dadaşova erməni ifaçıya “super” şərhini yazmışdı. Siz bunu edərsiniz” deyə, sual ünvanlanıb. Röya isə “Danışmadığım müğənninin mahnısını zümzümə edərəm. Amma millətimi incidənə “super” yazmaram. Çünki mən qarabağlıyam, bu qədər əziyyət qabağında “super” yazacam?” cavabını vermişdi.

B.Dadaşova isə İnstaqramda R.Ayxanı izləmədən çıxararaq video paylaşmış və bu ifadələri işlətmişdi:

“Publikaya oynamaq yaxşı şey deyil. Röya bu mövzunu bilmirsə, deyərdi ki, xəbərim yoxdur. Xəbərdar olmadığın nədənsə danışmaq olmaz. Ona görə məyus oldum, gözləmirdim. Məni görəndə “sənətkarımsan” deyən adamdan bunu gözləməzdim”.


Paylaş: