Prodüser Tarix (Tolik)Əliyev Teleqraf.com-un suallarını cavablandırıb.
- Tarix bəy, aparıcılıq etdiyiniz “Hər şey daxil” verilişi bağlandı. Bu haqda nə deyə bilərsiniz?
- Əslində, boynuma alıram ki, bu günah bizim və kamandamızın idi. Üç ildir ki, səhər-səhər insanların evinə qona gəlirdik. Murad müəllim istəsəydi məni böyük bir töhmətlə işdən çıxarardı. Amma sağ olsun, belə etmədi.
Murad Dadaşovun layihələrində iştirak etmişəm. Murad müəllim mənə belə bir söz dedi: “Bu dəqiqə istəsəm sənin əmrini verib işdən çıxararam. Amma bunu etmirəm. Bu veriliş nə səndən əvvəl, nə də səndən sonra olmayacaq. “Hər şey daxil” verilişi bitdi”. Onun yerinə yeni veriliş gəlir.
- Yeni verilişə nə zaman başlayırsınız?
- Hələ “Hər şey daxil” verilişi yeni bağlanıb. Xəzər televiziyasından işdən çıxmamışam. Murad Dadaşovun yeni komandası gəlir. Onlar mənim yeni verilişim üçün dekor hazırlayacaqlar.
- Yeni verilişiniz də şou xarakterli olacaq?
- Təbii ki, yeni verilişimiz də şou xarakterli olacaq. Biz çalışırdıq ki, bayağı müğənniləri verilişə çox dəvət etməyək. Amma bizim tamaşaçımız əfsuslar olsun ki, əksəriyyəti o cür müğənniləri izləyirlər.
Bilmirəm reytinqi müəyyənləşdirən 400 cihaz kimin evində yerləşir?! Mənim verilişimdə şəhid anaları olub, sosial mövzular da qoyulub. “Hər şey daxil” verilişinə Zülfiyyə Xanbabayeva, Mənsum İbrahimov qonaq gəlib. İki il Mənsum İbrahimovun ad gününü canlı yayımda qeyd etmişik. Həmin verilişlər də reytinq verib. Amma loru dil ilə desək gözünüz mazol edən bayağı ifaçılar var ki, həftədə üç dəfə də qonaq olsalar reytinq verirlər.
Mən verilişin dayandığı həftə öz saatımda reytinqdə birinci idim. Çünki birinci gündən qalmaqallı mövuzlar müzakirə edilirdi. “Hər şey daxil”verilişinin reytinqi Nanə Ağamalıyeva, Kamran Həsənli və Nazilə Səfərlinin aparıcılıq etdiyi verilişdən yüksək idi.
Ən çox sponsor da mənim verilişimdə idi. İnsanlarda tənqidi yanaşma var. Amma bayağı ifaçılara və qalmaqallara meyillidirlər.
- Elza Seyidcahan və Mətanət Əsədova arasında verilişdən sonra da müharibə davam edir.
- Veriliş doqquza iyirmi dəqiqə qalmış başlayırdı. Elza xanım isə saat 10-da mənə mesaj yazdı. Ona dedim ki, bu mövzunu davam etməyəcəm. Amma hər bir məsələdə qarşı tərəfin firkini öyrənmək lazım idi. Elza xanım efirə qoşulan zaman Mətanət xanımın mahnısından sitat gətirdi ki, at ola-ola özünü ulaq yerinə qoyub. Bu da ona xoş gəlmədi və etik olmayan ifadə səsləndirdi.
Buna görə veriliş bitən kimi böyük iclas oldu. Hər şey yaxşı qurtardı. Əsas odur ki, mən yenə də Xəzər ailəsinin üzvüyəm. Buradan müğənnilərə demək istəyirəm ki, mən aparıcı deyiləm. Sizin hər birinizin iç üzünü yaxşı tanıyıram. Amma bu dəfə sizin tərbiyəsizliyinizin qurbanı oldum.
Sağ olsun Murad müəllim məni işdən töhmətlə çıxarmadı. Mənə şans verdi və inşallah, çox yaxşı işlər görəcəyik. Mütləq yeni veriliş olacaq. Yəqin ki, veriliş üçün bayramdan sonra yeni dekor hazırlanacaq.
Artıq “Hər şey daxil” verilişi yoxdur. Mənim əvəzimə verilişə kiminsə aparıcılıq etməsi yandırardı. Çünki o verilişə görə çox əziyyət çəkmişəm.
- Veriliş bağlanandan sonra Mətanət Əsədova ilə əlaqə saxlamısınızmı?
- Xeyr. Mənə Manaf Ağayev zəng elədi. Elza xanım dəfələrlə zəng edib. Burada ölüm-itim yoxdur ki. Mən prodüserəm. Fakt odur ki, aparıcılıq etdim və bunu üç ildə bacardım. Yenə edəcəm. Allah məni heç bir müğənniyə möhtac qoymasın.


Paylaş: