Xəbər verdiyimiz kimi, fevralın 1-dən etibarən məktəbəhazırlıq və ibtidai təhsil səviyyəsi üzrə tədris sanitar-gigiyenik tələblər nəzərə alınmaqla ənənəvi formada başlayıb.

Buna baxmayaraq, valideynlərin bəzisi narahatlıq keçirdiyi üçün övladlarını məktəbə yollamaqda tərəddüd edirlər.

Məsələ ilə bağlı danışan müğənni Xuraman Şuşalı da öz övladlarını məktəbə göndərmədiyini deyib. Sənətçi məktəbdə şagirdlərin maska ilə oturmağına qarşı olduğunu qeyd edib:

“Mən öz övladımı məktəbə göndərmədim. Çünki deyirlər ki, sinifdə də maska ilə oturmaq lazımdır. Bu uşaqlara çox ziyandır, belə olmaz axı. Uşaq əlini divara, qapıya, 50 yerə vurur, sonra maskaya vurur. Biz onların yanında olmuruq axı, evdə gözümüzün qarşısında əllərini hər yerə vururlar. Sinifdə balaca yerdə otururlar, beyinə oksigen getmir. Mən istəyərdim ki, təhsil ya məktəbdə olsun, ya da bu uşaqlar birdəfəlik evdə otursunlar.

Məktəbləri açmaqla insanları yenidən çaş-baş salıblar. Elə adamlar var ki, məktəb açılır deyə övladına dayə, sürücü tutur. 15 gün işləyir, sonra yenə onlayn tədrisə keçirlər. Məktəbdə ara məsafə saxla, uşaqlarla yaxınlıq etmə, bunlar hamısı uşaqlara psixoloji problem olacaq. Biz görmüşük ki, uşaqları dostluğu, yaxınlığı olar, münasibətlər belə başlayar. Bu onların gələcəyinə çox pis fəsaddır. Uşaqlar bizim gələcəyimizdir, biz öz gələcəyimizi bütün günü maska taxmaqla niyə korlamalıyıq?”


Paylaş: