Son bir neçə ildə sosial şəbəkələrdə Azərbaycan futbolunu yerli serialların gününə bənzədib, dünyaca məşhur seriallarımızın olmadığı kimi, oyunçularımızın da olmadığı müzakirə edilir. Oyunçularımız bu bir neçə ildə tanınsa da, yerli seriallarımız dünya kino bazarına çıxa bilmir ki, bilmir.

Bunun da səbəbini Əməkdar mədəniyyət işçisi, rejissor Ramin Hacıyev Moderator. az-a açıqladı:

 “Serialla futbolumuzu bir-birinə bənzətmək doğru deyil, mən bu söhbətlə razı deyiləm. Futbola ayrılan vəsaitin yarısının yarısı belə seriallara ayrılsaydı, o zaman bizim seriallarımız da inkişaf edərdi. Xatırlayırsınızsa, 2009-cu ildə cənab pezident İlham Əliyev büdcədən yerli seriallarımıza 5 milyon pul ayırmışdı. Seriallarımızın inkişafı o zamandan sonra başladı. Maliyyə yardımı dayandırıldıqdan sonra yerli telekanallar serialları ucuz qiymətə almağa başladılar. O zaman da seriallar bu vəziyyətə düşdü.

Futbolumuz isə hazırda dünya arenasına çıxır. Onların içərisində komandanın hamısı Azərbaycan yığması olmasa da, klublarımız dünya arenasında oynayır. Serialla futbolumuzu müqayisə edirlər… Heç olmasa, dünyaca məşhur 2 serialımızın adını çəkə bilərsinizmi? Misal göstərib desinlər ki, bu, Azərbaycan serialıdır. Az da olsa, bəzi filmlərimiz dünya arenasına çıxa bilib – “Nar bağı”, “Buta” filmləri dünya miqyasında nəsə əldə edib, o da uşaq obrazına, ikinci plan aktyorlarına gör yer tutub. Onlar maraqlı filmlərdir, fəxrimizdir. Amma dünya kino arenasında yenə də o deyil. Milyard filmin içində bir uşaq roluna görə nəsə əldə ediriksə, bu, uğur deyil. Bu addımla getsək, heç vaxt Azərbaycan serialı dünya kino bazarına çıxa bilməyəcək. Bunun ən böyük səbəbi isə maliyyədir. Maliyyəni də azaldan kanallarımızdır. Serialı o qədər ucuz qiymətə alırlar ki… Rejissor işləmək istəyir, yaradıcılıq eşqi, ruhu ilə doludur, yaratmaq, çəkmək istəyir. O bir misal var, deyir baş dolu, cib boş. Biz də onun kimi”.


Paylaş: