Cəmiyyətdəki etirazlara, Təhsil Nazirliyinin xəbərdarlıqlarına, direktorların cəzalandırılmasına, bəzilərinin hətta işdən qovulmasına baxmayaraq, Azərbaycanın orta məktəblərində şagirdlərdən müxtəlif adlarla pul toplanması “ənənəsinin” kökünü kəsmək mümkün olmur ki, olmur.
Şagirdlərdən pul tələb edilməsi ilə bağlı növbəti məlumat Bakının Yasamal rayonunda yerləşən 20 nömrəli məktəb-liseyin valideynlərindəndaxil olub.

“AzPolitika.info”ya müraciət edən valideynlər hansı sinifdə oxumasından asılı olmayaraq, hər bir uşaqdan 30 manat pul tələb olunduğunu iddia edirlər. Bildirilir ki, bu vəsaitin toplanması məktəb rəhbərliyinin əlaltısına çevrilən valideyn komitələrinin başçılarının əli ilə həyata keçirilir. Pulun yığılmasına səbəb olaraq isə məktəbdə aparılmalı olan təmir işləri göstərilir.

“Ötən ay da müxtəlif bəhanələrlə pul yığmışdılar. İndi də hər uşağa 30 manat istəyirlər. Mənim 2 uşağım orda oxuyur. Ödəməkdən təngə gəlmişik, sanki uşaqlarımız orta məktəbdə yox, pullu universitetdə oxuyur”, – narazı valideyn bildirir.

Lakin maraqlıdır ki, sözügedən məktəbin binası yenicə tikilərək istifadəyə verilib. Həmçinin, bu təhsil ocağı üçün əvvəlkindən daha böyük, ən müasir və dünya standartlarına uyğun yeni bina inşa edilib. Ölkəmizin ən böyük təhsil müəssisəsi olan 20 nömrəli məktəb-liseyin binası indi paytaxtın müasir və memarlıq baxımından zövq oxşayan ən yaraşıqlı binalarından biridir. Məktəbin yeni binasının tikintisindən cəmi 2 ilə yaxın vaxt keçib və onun açılışında ölkə başçısı və Birinci vitse-prezident iştirak ediblər. Bəs, görəsən, belə qısa müddətdə nə baş verib ki, məktəbin təmirə ehtiyacı yaranıb?

Sözügedən məktəbdə 3000 (üç min) nəfərə yaxın şagird təhsil alır. Əgər valideynlərin dedikləri həqiqətdirsə, deməli şagirdlərdən təmir adı altında yığılan vəsait ümumilikdə təqribən 90 min manat təşkil edir. Valideynlər bu pulun toplanması prosesilə bağlı redaksiyamıza səs yazısı da təqdim ediblər.

Məlumat üçün bildirək ki, məktəbin direktoru Səadət Veysova əvvəllər Şamaxı Rayon Təhsil Şöbəsinin müdiri postunda və Təhsil Nazirliyinin özündə vəzifə daşıyıb.

Yazıda göstərilən məlumatlarla bağlı məktəb rəhbərliyinin də mövqeyini dərc etməyə hazırıq.


Paylaş: