Oktyabrın ilk günlərində yerli saytlar xarici mediaya istinadən xəbər yaydılar ki, Hollandiyanın Lahey şəhərində bir nəfər oğurluq şübhəsi ilə polis tərəfindən saxlanılıb. Polis şübhəlini saxlarkən, həmin şəxsin çiynində oturan tutuquşunu da “şahid” qismində bölməyə aparıb. Polis Utrext şəhərində etdiyi oğurluqla bağlı saxlanılan şəxsin tutuquşusunu şüşə ilə əhatələnmiş nəzarət məntəqəsində saxlayıb, quşa yemək verib. Lahey polis mərkəzi tutuquşunun fotosunu sosial şəbəkə hesabında paylaşıb. Məlumata görə, bir neçə saat sonra tutuquşu sahibi ilə birgə sərbəst buraxılıb.

Bizdə isə hüquq-mühafizə, cinayət təqibi, məhkəmə orqanlarına lazım olmadıqda, vasitəçini belə şahid qismində işə cəlb etmirlər.

Şəki penitensiar müəssisəsində cəza çəkən məhkum Kərimov Ramiz Ərrəhman oğlu saytımızın redaksiyasına müraciət ünvanlayaraq, Samux rayon Mərkəzi Xəstəxanasının Cərrahiyyə şöbəsinin müdiri Rəfail Əsədovun qanunsuz əməlləri barədə məlumat vermiş, qarşılaşdığı problemi ictimailəşdirməyimizi, aidiyyati qurumlara çatdırmağımızı xahiş etmişdir.

Bildirir ki, həkim Əsədov sələmçiliklə məşğuldur: "Samux rayon Qarayeri qəsəbə xəstəxanasının həkimi Azər Bağırova Gəncə şəhər Təcili Tibbi Yardım Xəstəxanasının baş həkimi təyin olunması üçün ondan qızıl zinət əşyalarını girov götürərək, 10000 ABŞ dolları və 8000 manat sələm vermişdir.

Ramiz Kərimov qeyd edir: "İddiaçı Azər Bağırov ibtidai istintaq və məhkəmə iclasında da öz ərizəsində bildirib ki, onu mənimlə həkim Rəfail Əsədov tanış edib. İddiasında yazır ki, Rəfail Əsədov bir gün məni onun iş otağına gətirərək bildirib ki, Ramiz mənim 15 illik dostumdur, Ramizin geniş imkanları, etibarlı dostları var. Səni Gəncə şəhər TTYX-na baş həkim vəzifəsinə düzəldə bilər. Amma mən əvvəlcə Ramizə inanmadım, amma sonra həkim yoldaşım Rəfail Əsədova inanaraq TTYX-na baş həkim düzəlməyim üçün Ramizə 16000 manat pul verdim. Göründüyü kimi, iddiaçı Azər Bağırov da bu faktı təsdiq edir ki, bizi məhz Rəfail Əsədov tanış edib və o pulu Rəfailə inanaraq mənə verib. Bu hal Rəfailin vasitəçi rolunu tam təsdiq edir. Lakin iş materialllarından da göründüyü kimi, bu barədə Rəfail Əsədovun ifadəsi alınmayıb. Nə də o, bu cinayət işinə cəlb olunmayıb. Bu da onu deməyə əsas verir ki, Rəfail Əsədov istintaq orqanının və məhkəmənin "bığının altından" keçərək əyri yollarla "çulunu sudan çıxarmağı" bacarıb. Məhz bu səbəbdən də Rəfail Əsədov cinayət məsuliyyətinə cəlb olunmayıb. Halbuki, iddiaçı Azər Bağırovun işə düzəlmək üçün Rəfail Əsədova qızıl zinət əşyasını verərək ondan yuxarıda qeyd etdiyim məbləği almışdır və həmin pulu da mənim ona olan borcuma hesablamışdır. Əlbəttə ki, bu, çox böyük haqsızlıqdır. Odur ki, bir daha sizdən xahiş edirəm, ərizəmdə göstərdiyim halları nəzərə alıb Rəfail Əsədovun bu və digər qanunsuz əməllərini ifşa edərək Səhiyyə Nazirliyinə və Baş prokurorluğa təqdim edəsiniz".

Nədənsə, bizə də belə yəqin hasil olur ki, doktor Rəfail Əsədov şahid qismində dindirilərsə, bir çox başqa mətləblər üzə çıxar. Onun özünün də məsələə münasibət bildirmək haqqını tanıyırıq. //azerinfo.az//


Paylaş: