Tovuz rayon Düzqırıqlı kənd sakini Məhərrəmov Novruz Qara oğlu AYNA-nın redaksiyasına məktub ünvanlayıb. O, həmyerlisi olan keçmiş polis əməkdaşı Həsənov İlham İmran oğlundan şikayətçi olduğunu bildirib.

“Yaşadığımız evin qarşısında yerləşən, 1991-ci ildən isə istifadəmizdə olan həyətyanı torpaq sahəsini, bizim ailənin xəbəri olmadan, keçmiş dövlət məmuru Həsənov İlham İmran oğlu öz əlaqələrindən istifadə edərək saxta imzalarla sənəd düzəldərək mənimsəyib. Bu gün də həmin saxtalaşdırılmış dövlət sənədini əlində əsas tutaraq və əlaqələrinə güvənərək bizim ailəyə qarşı ağlasığmaz haqsızlıq edilir. Sənəddəki imzaların saxta olduğu da açıq-aşkar bilinir”, - N.Məhərrəmov yazıb.

Şikayətçinin sözlərinə görə, Tovuz Rayon İcra Hakimiyyəti məsələni bildiyi halda, bu saxtakarlığa göz yumur: “Dəfələrlə Tovuz Rayon İcra Hakimiyyətinə müraciət elədim. Müraciətdən sonra ard-arda iki dəfə əraziyə baş çəkildi. Əraziyə baş çəkən nümayəndələrin hər biri torpağın açıq-aşkar mənə məxsus olduğunu təsdiq etdilər. Lakin sözügedən dövlət sənədinin saxta olduğunu Tovuz Rayon İcra Hakimiyyətindən bilsələr də, bu saxtakarlıqda özlərinin də əli olduğu üçün və birbaşa məsuliyyət daşıdıqları üçün, eləcə də bu saxtakarlığa vəsilə olan adamı tanıdıqlarına görə, sözügedən haqsızlığa son qoymurlar. Bu isə bizdə və bu haqsızlığı bilən çox saylı insanlarda böyük nifrət və aqressiya yaradır”.

Narazı vətəndaş məsələdən xəbər tutmağını belə izah edib: “2 il bundan əvvəl mən də digər həmkəndlilərim kimi həyətyanı torpaq sahəmi rəsmi qaydada sənədləşdirmək istədim. Buna görə də hal-hazırda yaşadığımız Tovuz Rayon Düzqırıqlı Kənd Bələdiyyəsinə müraciət etdim. Lakin kənd bələdiyyə sədri Cəfərov Qüdrət Dadaş oğlu mənə bildirdi ki, torpaq uzun müddətdir Həsənov İlham İmran oğlu adlı şəxsin adınadır. Tərəddüd etmədən torpaq sahəsinin 1990-ci ildən mənə məxsus olduğunu bildirdim. Qüdrət Cəfərov isə bunun əksini iddia edərək, torpağın 2002-ci ildən həmin şəxsə məxsus olduğunu əlavə etdi. Lakin 2002-ci ildə Düzqırıqlı kəndində rəhbər vəzifələrdə işləmiş şəxslərlə əlaqə saxlayanda, belə bir şeyin tamamilə yanlış olduğunu bildirdilər. Buna görə də dərhal araşdırmalara başladım və sənədləri araşdırandan sonra saxta olduğunu dəqiqləşdirdim”.

“Neçə il bundan əvvəl həyətyanı torpaq sahəmi sənədləşdirmək istəyəndə, kəndin hazırki bələdiyyə sədri Qüdrət Cəfərov mənə demişdi ki, torpağı hazırkı tarixə sənədləşdirsəm, bu, mənə baha başa gələcək, amma sənədləşmə işini 10-15 il əvvəl üçün aparsam, kiçik məbləğlə işi həll edə bilərəm. Bu baxımdan mənə məxsus olan torpaq sahəsinin İlham adlı şəxsin adına 2002-ci il üçün saxta formada sənədləşməsində kənd bələdiyyə sədrinin rolu olduğuna əminəm”, - deyə şikayətçi əlavə edib.

Məhərrəmovun sözlərinə görə, problemin həlli üçün Tovuz Rayon Prokurorluğu və Respublika Baş Prokurorluğuna da müraciət ünvanlayıb: “Mən bu problemin həlli üçün Tovuz Rayon Prokurorluğuna müraciət elədim. Prokurorluqdan mənə kömək edəcəkləri ilə bağlı söz verdilər. Lakin şikayətimin üzərindən 2 il keçməsinə baxmayaraq, Prokurorluq hələ də problemin öhdəsindən gəlməyib. Məsələnin cinayət tərkibli olduğunu və işə baxılmadığı üçün onlardan Respublika Baş Prokurorluğuna şikayət edəcəyimi desəm də, istədiyim yerə şikayət edə biləcəyimi vurğuladılar. Respublika Baş Prokurorluğu da şikayətimə ümumiyyətlə reaksiya vermədi”.

Tovuz sakini, torpaq sahəsinin ona məxsus olduğunu sübut edən bir hadisəni də diqqətə çatdırıb: “1997-ci ildə mərhum Prezident Heydər Əliyev sərəncam verdi ki, 1990-ci ildən 1996-cı ilə qədər “zəbt olunmuş və ya dövlət tərəfindən verilmiş və sənədləşdirilməmiş həyətyanı torpaq sahələri təmənnasız olaraq istifadəçilərin öz adına sənədləşdirilsin”. Həmin sərəncam əsasında, 1999-2000-ci illər ərzində Respublikada sənədləşmə işlərinə start verildi. Qüdrət Cəfərov də Aqrar İslahat Komissiyasının, bu fərmana əsasən həmin ərazini İlham Həsənovun adına sənədləşdirdiyni iddia edir. Aqrar İslahat Komisiyası isə bələdiyyə və kənd icra nümayəndəliyindən arayış almadan sənədləşmə işini apara bilməz. Çünki sənədləşmə üçün həmin illərdə fəaliyyət göstərən rəhbər şəxslərin verdikləri arayışlar olmaldır. Həmin şəxslər isə ümumiyyətlə belə bir şey olmadığını deyir və inkar edirlər. Ümumiyyətlə Aqrar İslahtalar Komissiyası o ərazidə heç bir torpaq sahəsini qeydiyyata almayıb. Yəni ki, heç kəsə sənəd verilməyib”.

Problemə aydınlıq gətirilməsi üçün Tovuz Rayon İcra Hakimiyyəti ilə əlaqə saxlmağa dəfələrlə cəhd etsək də, məlumat əldə edə bilmədik. Gah səlahiyyətli şəxsin yerində olmadığını dedilər, gah da zənglərimizə cavab vermədilər.

2002-ci ildə Tovuz rayon İcra Hakimiyyəti (RİH) başçısının Düzqırıqlı kənd icra nümayəndəsi kimi fəaliyyət göstərən Azər Zeynalov AYNA-ya açıqlamasında məlumatı təsdiqləyib: “Həmin həyətyanı torpaq sahəsinin 2002-ci ildə verildiyi deyilir. Lakin 2002-ci ildə verilən ərazi başqadır. Novruz Məhərrəmovun istifadəsində olan torpaq sahəsinin İlham Həsənovun adına təsdiqlənməsi üçün biz tərəfdən heç bir sənəd verilməyib. Novruz Məhərrəmov 1991-ci ildən həmin ərazini istifadə edir. Lakin İlham Həsənov 2002-ci ildən bu əraziyə sahib olduğunu iddia edir”.

Tovuz RİH başçısının Düzqırıqlı kənd üzrə icra nümayəndəsi Elçin Xasıyev isə sualmıza cavab verməkdə çətinlik çəkdi və kənd icra nümayəndəsi olduğu halda hadisədən məlumatsız olduğunu bildirdi. Ardınca sualımızı təkrarlamaq istəyərkən, telefonu sərt şəkildə üzümüzə söndürdü.

2002-cildə Düzqırıqlı Kənd Bələdiyyəsinin sədri kimi fəaliyyət gsötərən Laçın Quliyeva AYNA-ya açıqlamasında, onun fəaliyyəti dövründə belə bir sənədə rast gəlmədiyini deyib: “Həmin illərdə mən belə məsələlərə çox da əhəmiyyət vermirdim. Lakin bu sənəd hansı yollarla əldə olunubsa, araşdırmaq lazımdır. Həmin sənədlər mənim fəaliyyət göstərdiyim illərə təsadüf etsə də, sənəddə mənim imzam yoxdur. Ona görə də mən bu barədə dəqiq heç nə deyə bilmərəm. Prosesdə kimlərin əli olubsa, həmin şəxsləri də məsələyə cəlb etmək lazımdır. Mən isə heç kimdən şübhələnmirəm”.

Düzqırıqlı Kənd Bələdiyyəsinin hazırkı sədri Qüdrət Cəfərov isə AYNA-ya verdiyi açıqlamada, ərazinin 2002-ci ildə qeydiyyatdan keçməsini təsdiqləyib: “Bu barədə Rayon İcra Hakimiyyəti və digər səlahiyyətli qurumlara məlumat verilib. 1992-ci ildə Aqrar İslahatlar Komissiyası tərəfindən həyətyanı torpaq sahələrinin qeydiyyata alınma prosesi gedəndə, sözügedən ərazi İlham Həsənovun adına qeydiyyatdan keçərək dövlət aktı verilib. Həmin dövrdə Aqrar İslahatlar Komissiyası, Kənd İcra Nümayəndəliyi, Kənd Bələdiyyəsi və Rayon Torpaq Şöbəsinin qərarı ilə ərazi İlham Həsənovun adına qeyd olunub. Həmin dövrdə isə mən bu vəzifədə işləməmişəm. Hətta 2003-cü ilin elektron xəritəsində də həmin ərazinin Həsənov İlham İmran oğluna aid olduğu göstəririlir. Məlumdur ki, bizim bu sənədi ləğv etməyə heç bir ixtiyarımız yoxdur. Lakin 2003-cü ilin elektron xəritəsini də indi təyin edə bilmərik deyə, sənədin saxta olub-olmamasına qərar verə bilmərik”.

Bələdiyyə sədri sözügedən sənədi saxtalaşdırmaqda ittiham olunmasına da münasibət bildirib: “Belə bir şey qətiyyən mümkün deyil. Aqrar İslahatlar Komissiyasının və Torpaq şöbəsinin qərarını mən 2002-ci ilin xəritəsində necə təsdiqləyə bilərəm? 2002-ci ilin elektron xəritəsinə baxanda həmin şəhadətnamə İlham Həsənovunn adında görünür. Buna baxmayaraq Novruz Məhərrəmov həmin ərazini hal-hazırda özü istifadə edir”.

Məsələ barədə AYNA-ya açıqlama verən Baş Prokurorluğun mətbuat xidmətinin rəhbəri Eldar Sultanovun sözlərinə görə, Məhərrəmov Novruz Qara oğlunun Tovuz Rayon Prokurorluğu və Respublika Baş Prokurorluğuna daxil olmuş müraciəti üzrə mülki qaydada məhkəmə orqanlarına müraciət etməsi barədə hüquqları izah edilib: “Novruz Məhərrəmov torpaq qanunvericiliyi ilə bağlı hüquqlarının pozulduğuna görə Tovuz Rayon Prokurorluğu və Respublika Baş Prokurorluğuna mürciət ünvanlayıb. Ona işin mülki məsələ olması izah edilib və mülki qaydada məhkəmə orqanlarına müraciət etməli olduğu bildirilib, hüquqları rəsmi qaydada ona izah edilib”.

Tovuz Rayon Prokurorluğundan da AYNA-nın sorğusuna cavab verilib: “Novruz Məhərrəmov 1990-cı illərdə sözügedən əraziyə sənədsiz olaraq sahiblənib. O, heç bir sənəd olmadan əraziyə sahiblənsə də, uzun müddət ərazini leqallaşdırmaq üçün sənəd düzəltməyə cəhd etməyib. Torpaq islahatları gedən dövrdə də İlham Həsənov müraciət edərək həmin ərazini öz adına rəsmiləşdirib”.

Prokurorluqdan onu da əlavə ediblər ki, şikayətçi onlara dəfələrlə müraciət edib: “Şikayətçiyə bu hadisənin mülki məsələ olması və buna görə məhkəməyə müraciət etməsi deyilib. Lakin həmin vətəndaş məhkəməyə müraciət etməmək üçün israr edir. Hər bir təşkilatın özünün funksiyası və səlahiyyətlər bölgüsü var. Yəni ki, həmin şəxs aidiyyatı quruma, yəni məhkəməyə müraciət etməlidir. Çünki bu məsələ prokurorluğun səlahiyyətləri daxilində deyil. Həmçinin prokurorluq şikayətçinin əvəzinə məhkəməyə müraciət də edə bilməz”.


Paylaş: