“Sahibkarlara tövsiyəm ondan ibarətdir ki, iş yerlərini ixtisar etməsinlər… Biz Azərbaycanda mütləq iş yerlərini qorumalıyıq – həm dövlət qurumlarında, həm özəl sektorda… Özəl sektor da heç bir ixtisar aparmamalıdır, əksinə, dövlətin bu qədər dəstəyi müqabilində daha çox iş yerləri açmalıdır”. Bu fikirləri Prezident İlham Əliyev bu ilin əvvəlində keçirdiyi toplantılardan birində söyləyib.

Prezident İlham Əliyev heç bir halda sahibkarları incitməməyi, iş yerlərinin bağlanmasına səbəb olacaq addımlar atılmamasını tövsiyə edib.

Ancaq deyəsən, bəzi məmurlar kimi, bəzi iş adamları, iri ticarət mərkəzinin sahibləri də Prezidentin tövsiyələrini eşitməyiblər, ya da eşitmək istəmirlər. Hər halda dövlət başçısının tövsiyələrinin əksinə olaraq iş yerlərini bağlayan, bir qrup insanın, hətta şəhid ailələrinin belə qazanc yerlərini əllərindən alan sahibkarlar var.

Bakı şəhəri, Yeni Yamal 2, ev 7, mənzil 192-də yaşayan, kiçik sahibkarlıqla məşğul olan Bağırova Turac Zaman qızı tərəfindən “AzPolitika.info” saytına göndərilən məktubdan belə məlum olur ki, hamının “Moskva” Univermağı kimi tanıdığı “Moskva” Ticarət Mərkəzi Qapalı Tipli Səhmdar Cəmiyyətinin (QTSC) sahibləri belə bir addım atıblar.

Ölkə prezidenti İlham Əliyevə, I vitse-prezident Mehriban xanım Əliyevaya müraciət edən Turac Bağırova məktubunda bildirir ki, “Moskva” Ticarət Mərkəzinin sahibləri şəhid ailələrinin də yeganə qazanc yerinini bağlamaqla kifayətlənməyib, onların əmlakını da gizlincə çıxaraq naməlum istiqamətdə aparıb. Ən dəhşətlisi isə odur ki, bu işdə müafiq dövlət orqanları da “Moskva” Ticarət Mərkəzinin sahiblərinin istəyini yerinə yetirib. Nəyin qarşılığında, müəyyən etmək çətin deyil…

“Moskva” TM-in sahibi bizdən 2000, 2500 alırdı, sənəddə 120 və ya 180 manat göstərilirdi”

T.Bağırovanın yazdığına görə, o, 1994-cü ildən ailəsilə birgə istehsalat sahəsi açıb: “Həmin sahədə 15 nəfər işçi olmaqla mən və həyat yoldaşım fəaliyyət göstərməyə başladıq. İşə başlamazdan əvvəl “Moskva” Ticarət Mərkəzi QTSC-nin tərkibində H.B.Əliyev 14 ünvanında yerləşən 72 kv.metr səhəsi olan bir mərtəbəli tək tikili köskü 500 dollara icarəyə götürdük (sənəddə əvəl 120, sonra 180 manat göstərilirdi). Müqavilə hər dəfə müddəti 5 il olmaqla bağlanırdı. Biz həmin sahəni öz ailə büdcəmizin heabına tam təmirli bir yerə çevirdik. İcarəyə verən “Moskva” Ticarət Mərkəzinin (TM) direktoru olan Elmira Mədətova həmin köşkü gözəl, işıqlı yerə çevirdiyimi gördü və çox razılığını bildirdi. O, dedi ki, artıq 14-cü icarədar idi ki, bura gəlirdi, lakin işlədə bilməyib, icarəni də verməyib çıxırdı”.

T.Bağırova yazır ki, həmin yerdə “Sünbül” adlı un məmulatları və şirniyyat məhsulları istehsalı ilə məşğul olan kiçik müəssisə açıb: “2001-ci ilə kimi həm istahsal, həm də satış sahəsində yüksək nailiyyətlər əldə etdik. Sonra gördük ki, “Moskva” TM-ə məxsus olan həmin 72 kv.metrlik sahə bizim istehsalımız üçün kiçikdir. Biz E.Mədətovaya şifahi müraciət etdik. Sahənin az olduğunu bildirdik. O, isə bizə bildirdi ki, “istəyirsinizsə artırın, nə vaxt çıxsanız pulunu ödəyərəm”. Biz elə də etdik. Həmin köskü əvvəlcə mağazaya çevidik, sonra isə 38 kv. metr öz vəsaitim hesabına artırdıq. Bunun üçün həmin dövrdə 3 otaqlı bir evin pulunu xərclədik”.

Şikayətçi yazır ki, “Moskva” TM-in sahibi Elmira xanım mağazanın qarşısından keçəndə maşınından düşüb onların bu fəaliyyətini alqışlayıb. Ancaq sonradan icarə haqqını artırıb: “ İki ay keçmədi ki, ilk öncə 1000, sonra 1500, 2000, ən sonda 2500 manata kimi icarəni qaldırdı. Biz ona bildirdik ki, “bəs biz bura bu qədər xərc çəkmişik, siz də gedib-gəlib kirayəni artırırsınız”. O isə əvəzində dedi ki, “nə zaman çıxsanız, pulunuzu tam ödəyəcəm”. Ancaq müqavilədə hər dəfə çox kişik məbləğ göstərilirdi. Belə ki, “Moskva” TM-in sahibi bizdən hər ay 2000, son illər 2500 manat alsa da, müqavilədə 120 və ya 180 manat göstərilirdi. Etiraz etsək də, deyirdi ki, hamı belə işləyir”.

“Elmira Mədətova xəstələndi, işin başına qızı Esmira və oğlu Anar keçdi”

T.Bağırovanın sözlərinə görə, bir müddət sonra Elmira Mədətova xəstələnərək, yatağa düşüb: “Onun işini idarə edən isə qızı Esmira və oğlu Anar Babayev oldu. Onlar 2018-ci ilin avqust ayında adam göndərərək, bizim həmin istehsal sahəsindən çıxmağımızı tələb etdilər. Biz onlara bildirdik ki, qəbullarına gələrək danışarıq.

Biz “Moskva” Univermağına gəldik və oranı idarə edənlərlə, yəni Anar və Esmira Babayevlərlə görüşmək istədik. Onlarsa Mübariz və Elman adlı şəxslərlə bizlə görüşmək istəmədiklərini, sahəni boşaltmağımızı tələb etdiklərini bildirdilər. Dedik ki, “bəs biz oranı abadlaşdıraraq, 38 kv.metr sahə artırmışıq. O necə olacaq?”. Onlarsa heç bir kompensasiyanın olmayacağını və tezliklə ərazini boşaldacaqlarını bildirdilər”.

“Onların “qoçuları” gələrək işçiləri qovub, iş yerimizi bağladılar”

Şikayətçi qeyd edir ki, 2018-ci ilin sentyabr ayında bir qrup şəxs basqın edərək, onların kişik müəssisəsini bağlayıb: “Onların tapşırığı ilə “qoçular” gələrək işçiləri ordan qovub, iş yerimizi bağladılar. Hətta “plombladılar” da… Biz də öz qıfıllarımızı qapılara bağladıq. Belə 3 ay qaldı. Son zamanlarda, yəni təxminən 2019-cu ilin fevralın əvvəllərində özünü məhkəmə icraçısı kimi təqdim edən Yasamal rayon İcra Şöbəsinin icraçısı Sahib Allahverdiyev adlı şəxs mənə zəng vuraraq bildirdi ki, “tez gəlin, burada olan avadanlıqlarınıza Yasamal Rayon Məhkəməsi həbs qoymuş və saxlamaya alınmışdır, elə bunlar da burda qalacaq.”

““Moskva” univermağının rəhbəri Anar Babayev bizim əmlak və avadanlıqlarımızı oğurlayıb”

Mən şəhərdə olmadığımı, lakin növbəti gün gələcəyimi bildirdim. Növbəti gün gəldikdə sahədəki bütün avadanlıqlarımın oğurlandığını gördüm və Yasamal Rayon İcra Şöbəsinə getdim. Orada mənə bildirdilər ki, hakim Vahid Hacıyev bizim iştirakımız olmadan iclas keçirib, tez qərar çıxardaraq icraya göndərib. Bu qərardan istifadə edən “Moskva” Univermağının rəhbəri Anar Babayev də bizim əmlak və avadanlıqlarımızı həmin sahədən çıxardaraq oğurlamış, bizə məlum olmayan vasitə ilə talamışdır. Nəticədə, 15 nəfər işsiz qalmış, əmlak və avadanlıqlarımız isə məhv olunmuşdir”.

“Vaxtilə mərhum Prezidentimiz Heydər Əliyevə sui-qəsd etməkdə ittiham olunmuşdurlar”

T.Bağırova daha sonra məktubunda “Moskva” Univermağının hazırki sahibləri Anar və Esmira Babayevlərin kim olduqları barədə məlumat verir: “ Bu insanlar maştağalı hacı Seyfəlinin qardaşı uşaqları, “SAB” ticarət nişanı ilə ət və süd məhsulları istehsal edən «Zəhmət-Ruzi» MMC-nin sahibi, Hacı Sabir kimi tanınan Sabir Ataməli oğlu Babayevin övladlarıdır. Onu da qeyd edim ki, bu ailə hazırki iqtidara müxalif olmuş insanlardır.

Belə ki, bu ailənin bəzi üzvləri mütəqilliyimizin ilk vaxtlarında mərhum Prezidentimiz Heydər Əliyevə sui-qəsd etməkdə ittiham olunmuşdurlar. Hacı Seyfəl Sabunçu körpüsünü partlatmağa cəh etmiş quldur dəstəsinin başçısı olmuşdur”.

“15 ailəni çörəyə möhtac qoyublar, bizə kömək edin”

T.Bağırova sözügedən ailənin yenə də ölkə rəhbərliyinin siyasətinə qarşı çıxdığını iddia edir: “Bu günkü gündə də ənənəni davam etdirirlər. Anar və Esmira Babayevlər bütün univermağın hər kv.metrini yüksək qiymətə kirayə verib. Ancaq müqavilədə çox aşağı qiymətlər göstərərək, dövləti aldadırlar. Orada ticarət edən qızıl ticarətçilərinin başına min oyun açırlar. Bu azmış kimi bizim kiçik müəssisənini da bağlayaraq, 15 ailəni çörəyə möhtac qoyublar. Aralarında şəhid ailələrinin olmasını da nəzərə almayablar.

Bütün bunları nəzərə alıb, saytınız vasitəsi ilə bizim səsimizi ökəmizin Prezidentinə, vitse-prezidentinə və digər adiyyatı olan qurumlara çatdırmağınızı xahiş edirəm. Bizim kiçik istehsal müəssisəmizin və oğurlanmış əmlakımızın geri qaytarılmasında bizə köməklik göstərmələrini xahiş edirik. Hazırda orada çalışan və işsiz qalan 15 ailə çox ağır vəziyyətdə yaşayır. Övladlarımızın gündəlilk tələbatını ödəməkdə çətinliklə üzlımişik.

Ümidimiz möhtərəm Prezidentimizə və hörmətli vitse-prezidentimizədir. Bizə kömək edin! Əvvəlcədən öz təşəkkürümü bildirirəm”.

Qeyd edək ki, hazırda iş mahiyyətcə baxılması üçün Nəsimi Rayon 1 saylı İqtisat məhkəməsinə göndərilib. Ancaq T. Bağırovanın yazdığına görə, İqtisad Məhkəməsində baxılmalı olan işlə bağlı bundan əvvəl Yasamal rayonunun hakimi Vahid Hacıyev, Apellyasiyanın hakimi Vüqar Həsənov “Moskva” Univermağının sahibinin maraqlarına cavab verən qərarlar çıxarıblar. Yasamal rayon Məhkəmə icraçılarının rəisi Rəşad Abbasov “Moskva” Univermağının sahibinin istəyilə bu qərarları dərhal yerinə yetirib. Bununla bağl T.Bağırovanın müraciətini isə növbəti yazıda işıqlandıracağıq.

Turac Bağırovovanın müraciətində səsləndirdiyi iddialarla bağlı “Moskva” Univermağının hazırki sahibləri Anar və Esmira Babayevlərin də mövqeyini işıqlandırmağa hazırıq./AzPolitika.info/


Paylaş: