«Binə» ticarət mərkəzində bir neçə mağazası olan sahibkar Bəhruz Məmmədov sığorta şirkətlərindən narazıdır.

İş adamı FED.az-a bildirib ki, «Binə»dəki obyektlərini sığortalamaq üçün «Azsığorta», «Atəşgah» və «Paşa Sığorta» şirkətlərinə müraciət edib, amma üçündən də imtina alıb.
«Hər 3 sığorta şirkəti bildirdi ki, mənim obyektlərimi sığorta etməyəcəklər. «Azsığorta» əsas kimi onu gətirir ki, «Binə» ticarət mərkəzi riskli məkandır. Onlar deyir ki, Fövqaladə Hallar Nazirliyi (FHN) buranı təhvil almayıb, ona görə də sığortalaya bilmərik. «Atəşgah» və «Paşa Sığorta» şirkətlərindən isə heç bir əsas gətirmədən «Binə»dəki obyektlərimi sığorta etmədiklərini bildirdirlər»-deyə Bəhruz Məmmədov bildirdi.

Onun sözlərinə görə adlarını qeyd etdiyi sığorta şirkətlərinə hələ «Eurohome» ticarət mərkəzində yanğın baş verməmişdən əvvəl müraciət edib. «Şirkətlərə müraciət etmişəm ki, əməkdaş göndərin 3 obyektim var, sığortalayım. Deyilər ki, sığortalamırıq. Adam naraşat olur. Amma «Sədərək» ticarət mərkəzində çalışan yoldaşlar var, onlar öz dükanlarını sığortalatdırıblar. «Binə» ticarət mərkəzi yeni tikiləndə bir-iki sığorta şirkəti gəlib sığorta xidmətlərini təklif edirdilər. Amma sonradan onlar da yoxa çıxdılar. «Binə»də bir neçə dəfə yanğın olub. Fikrimcə sığorta şirkətləri də ona görə sığortalamırlar»- deyə Bəhruz Məmmədov bildirib.

İş adamı bildirir ki, bəzi sığorta şirkətləri mərkəzdəki mağazaları sığorta edirlər, amma bu yalnız yanğına aiddir, subasmadan sığorta etmirlər. «İstəyirdik ki, tanınmış sığorta “Atəşgah” “Paşa Sığorta” şirkəti ilə buranı sığortalatdıraq o da onlar yaxın durmadı»- deyə Bəhruz Məmmədov bildirib.

Sığorta eksperti İlkin İbrahimov da bildirir ki, sığorta şirkətləri «Sədərək» və «Binə» ticarət mərkəzini sığortalamırlar. Şirkətlər əsas kimi, ticarət obyektlərinin təhvil alınmadığını göstərirlər: «Fövqalədə Hallar Nazirliyi əgər obyekti istismara qəbul etmirsə, bu o deməkdir ki, bura riskli zonadır. Sual ortaya çıxır ki, əgər bura riskli zonadırsa onda niyə burda bu qədər adam çalışır?!”- deyə İlkin İbrahimov FED.az-a bildirib.


Paylaş: