Qaradağ rayonunda avtobusdan enmək istəyən sərnişin ağır xəsarət alıb. Hadisə Buta qəsəbəsində baş verib. 1980-ci il təvəllüdlü Elnur İsmayılov 126 saylı xətt üzrə hərəkət edən sərnişin avtobusundan düşmək istəyib. Bu zaman o, hərəkət etməyə başlayan avtobusdan yerə yıxılıb. Kəllə-beyin travması diaqnozu qoyulan yaralı 1 saylı şəhər xəstəxanasına yerləşdirilib.

Faktla bağlı Qaradağ Rayon Polis İdarəsində araşdırma aparılır. Məlumdur ki, ictimaiyyətdə ən ciddi və davamlı müzakirə olunan problemlərindən biri də marşrutlarla bağlıdır. Demək olar ki, hər gün mediada və sosial şəbəkələrdə avtobus sürücülərinin özbaşınalığını, sükan arxasında telefonla danışmaqlarını, hətta yeyib-içmələrini əks etdirən görüntülər yayılır. Ancaq bir sıra hadisələrdə sərnişinlər də tənqid olunur.

Ekspertlərin fikrincə, bəzi hallarda ictimai nəqliyyatda problem yaradanlar məhz sərnişinlərdir. Ancaq daha ciddi məqam sərnişinlərin sürücülərin yanlış hərəkətlərinə və davranışlarına laqeyd yanaşmaları, vaxtında reaksiya verməmələridir.

Onlar siqaret çəkir, ucadan danışır, musiqiyə qulaq asır, sərnişinlə kobud davranır və maşını harada gəldi saxlayır

Mövzu ilə bağlı “Şərq”ə fikirlərini bölüşən tanınmış jurnalist, siyasi ekspert Azər Həsrət də hesab edir ki, marşrutlarla bağlı problem təkcə sürücülərlə, avtobuslarla bağlı deyil.

Onun fikrincə, sərnişinlərin biganəliyi problemlərin birdəfəlik aradan qalxmasına imkan vermir:

“Hamımız az-çox ictimai nəqliyyatdan istifadə edirik. Mən özüm tez-tez metro və marşrutlardan istifadə edirəm. Açığı deyim ki, hər dəfə avtobusa minəndə əsəbiləşirəm. Bəzi sürücülərin özbaşınalığına hirslənirəm. Çünki sürücü siqaret çəkir, ucadan danışır, musiqiyə qulaq və sərnişinlə kobud rəftar edir. İstər-istəməz mənim kimi adam buna laqeyd qala bilmir və məcburiyyət qarşısında reaksiya verir. Hətta bəzən həmin sürücünün səviyyəsinə enəcək həddə çatıram. Ona görə də çox zaman mübahisədən qaçıram”.

A.Həsrət bildirib ki, sürücülərlə bağlı irad bildirəndə sərnişinlərdən heç kim ona dəstək vermir:

“Sürücü sükan arxasında siqaret çəkir, tüstüsünü içəri buraxır, amma avtobusdakılardan səs çıxmır. Səsini çıxaran isə tək qalır, insanlardan dəstək görmür. Əgər irad kütləvi şəkildə olarsa, ictimai mədəniyyəti bərpa etmək mümkündür. Sürücülərin dayanacaqlarda saxlamaması, bunun əvəzinə harda olsa saxlaması da ciddi problemlər yaradır. Yenə deyirəm, problemlər sadəcə “Baku Bus” və BNA-nın məsələsi deyil. Bu, ümumi ictimai problemdir. Hər bir sərnişin üzləşdiyi problemlə bağlı mövqeyini ortaya qoymalıdır. Şikayət etməkdən çəkinməməliyik”.


Paylaş: