“Yaranan yeddi günlük fasiləyə görə iyun ayında tədris müddətinin bir həftə uzadılacağını düşünmürəm”.

regionxeberlericom.az bildirir ki, bu fikirləri Yenicag.az-a açıqlmasında koronavirus riskinin azaldılması məqsədilə orta və ali məktəblərdə tədrisin bir həftə müddətinə dayandırılmasına münasibət bildirən təhsil eksperti Elşən Qafarov deyib.

Elşən Qafarovun sözlərinə görə, Azərbaycanda koronavirus təhlükəsi yüksək səviyyədə olmadığı üçün tədris ocaqlarının bağlanmasına o qədər də ciddi ehtiyac yox idi:

“Ümumtəhsil məktəbinin Nümunəvi Nizamnaməsinə əsasən, Təhsil Nazirliyi hava şəraiti və digər məsələlərlə əlaqədar tədris müddətinin vaxtını dəyişə bilər.

Bu baxımdan, indi elan olunan yeddi günlük fasiləyə görə iyun ayında tədris müddətinin bir həftə uzadılacağını düşünmürəm.

Ölkənin iqliminə uyğun olaraq, onsuz da hər il su çiçəyi, qrip, qızılça kimi xəstəliklər yayılır və bu o qədər də həyəcanla qarşılanmır.

İndi koronavirus riski səbəbindən tədris ocaqlarının bağlanması əhali arasında panikaya yol açır”.

Qeyd edək ki, Nazirlər Kabinetinin qərarına əsasən, yoluxma hallarının qarşısının alınması, bu sahədə aparılan müvafiq profilaktik tədbirlərin effektivliyinin yüksəldilməsi, ölkə ərazisində yerləşən bütün təhsil müəssisələrində tibbi-profilaktik, dezinfeksiyaedici və digər qabaqlayıcı tədbirlərin intensivləşdirilməsi məqsədilə 2020-ci ilin mart ayının 3-dən 9-dək (ilk tədris günü mart ayının 10-u müəyyən edilir) bütün təhsil müəssisələrində tədris, təlim-tərbiyə prosesi dayandırılıb və bununla bağlı bütün tədbirlər təxirə salınıb.


Paylaş: