Hazırda koronavirusla bağlı bütün dünyada, o cümlədən ölkəmizdə bir sıra məhdudlaşdırıcı tədbirlər görülür.

Bir sıra ölkələr gediş-gəlişə məhdudiyyət tətbiq edib, bəzi şirkətlər işçiləri ödənişsiz məzuniyyətə göndərib, “evdən iş” rejimi tətbiq olunur. Pandemiya ilə əlaqədar gəlir əldə etməkdə çətinlik çəkən vətəndaşların banklara kredit borcları üzrə ödənişilərinin təxirə salınması məsələsi gündəmə gətirilib. Milli Məclisin iclasında deputatlar bu məsələni qaldırıblar. Hökumət sahibkarların dəstəklənməsi üçün tədbirlər hazırlayır.

Bir sıra vətəndaşlar hesab edir ki, fors-major vəziyyəti yaranıb, epidemiyaya görə gəlir əldə edə bilmirlər. Buna görə, kredit müqavilələrindəki fors-major bəndindən istifadə edilərək vəziyyət sabitləşənə kimi ödənişlərin icrası dondurulmalıdır.

Maraqlıdır, belə bir vəziyyətdə kommunal xidmətlər üzrə ödənişlərə güzəşt tətbiq edilə bilərmi?

Mövzu ilə bağlı Cebhe.info-ya danışan millət vəkili Fazil Mustafa deyib ki, kommunal ödənişlərdə güzəşt tətbiq edilməlidir:

“Əhalinin gəlir səviyyəsi aşağı düşdüyünə görə bu istiqamətdə hökumət müəyyən addımlar düşünməlidir. Ümumiyyətlə, hökumətin qərarında bu, öz əksini tapa bilər və bu istiqamətdə açıqlama veriləcək”.

İqtisadçı-alim Fuad İbrahimov isə bildirib ki, bu, nəzəri cəhətdən mümkündür:

“Dövlət buna gedə bilər, lakin bu, həm də vətəndaşların borclanmasına şərait yaradar. O zaman borcu ödəmək müşkül məsələyə çevrilər. Hesab edirəm ki, bunun xeyrindən çox zərəri dəyə bilər”.


Paylaş: