“2014-cü il tarixdən bronxial astma xəstəliyinə görə 2-ci qrup əlil olmuşam. Buna görə, hər ay dövlət büdcəsi hesabına dərmanla, tibbi pereparatlarla təmin olunurdum. Artıq iki aydır ki, Göyçay rayon Mərkəzi xəstəxanası dərmanlarımı vermir. Səbəbi isə həmin xəstəxananın baş həkimi Elçin Bilalov astma xəstələrinin dərmanlarını aptekdə satdırıb, talançılıqla məşğul olmasıdır”. Bu barədə Göyçay rayonu H.Hacıyev küçəsi, ev 188-də yaşayan Mustafayev Rasim Əhəd oğlunun Hurriyyet.org-a yazdığı şikayət məktubunda deyilir.

“Artıq 2 aydır heç bir xəstəyə həmin dərman verilmir, apteklərdə satdırılır”

R. Mustafayev qeyd edib ki, Göyçay rayon Mərkəzi Xəstəxanasında pulsuz dərmanları Elza adlı həkim paylayır: “Elza həkim Göyçay rayon Mərkəzi Xəstəxanasının baş həkimi Elçin Bilalovla qudadır. Bu korrupsiyaya qurşanmış qudalar Göyçayda yaşayan ağır xəstələrin dərmanlarını satdırıb, cinayət əməlləri ilə məşğul olurlar. “Erflyusal” adlı dərmanın qiyməti 55 manatdır. Həmin dərman xəstələrə paylanması üçün hər ay Göyçay xəstəxanasına çoxlu sayda gəlir. Artıq 2 aydır heç bir xəstəyə həmin dərman verilmir, apteklərdə satdırılır. Bu səbəbdən biz xəstələr ölümlə üz-üzə qalmışıq. Elçin Bilalov Göyçay rayon Mərkəzi Xəstəxanasına baş həkim vəzifəsinə təyin ediləndən sonra xəstəxanada korrupsiya cinayətləri artıq rəsmiləşdirilib”.

“Göyçay rayon mərkəzi xəstəxanasında ölüm halları da çoxalıb”

R. Mustafayevin sözlərinə görə, Göyçay rayon mərkəzi xəstəxanasında pullu xidmət yaradan baş həkim Elçin Bilalovun korrupsiya əməllərinin araşdırılıb, barəsində ciddi tədbirlər görülməsinə zərurət var: “Regionda həmişə nümunəvi yüksək tibbi xidmət göstərən Göyçay rayon xəstəxanasını baş həkim Elçin Bilalov biabırçı vəziyyətə salmışdır. Kolxoz bazarına döndərilən Göyçay rayon mərkəzi xəstəxanasında ölüm halları da çoxalıb”.

“Elçin Bilalov xəstələrin dərmanlarını vermir, apteklərdə satdırıb, talançılıqla məşğul olur”

Şikayətçi vurğulayıb ki, imkansızlığa görə dərman ala bilmir:“Bu səbəbdən səhhətim çox ağırlaşıb. Hazırda bütün dünyada, o cümlədən Azərbaycan Respublikasında koronavirus xəstəliyi ilə əlaqədar ciddi mübarizə aparılır, xüsusi karantin rejimi tətbiq edilib. Elçin Bilalov bundan sui-istifadə edib, korrupsiya cinayəti ilə məşğul olur, xəstələrin dərmanlarını vermir, apteklərdə satdırıb, talançılıqla məşğul olur”.

R. Mustafayev sonda prezident İlham Əliyevə müraciət ünvanlayıb: “Cənab prezident, xahiş edirəm, xəstələrin dərmanlarını satdırıb mənimsəyən Göyçay rayon Mərkəzi Xəstəxanasını korrupsiya yuvasına döndərmiş baş həkim Elçin Bilalovun və onun qudası Elza həkimin barəsində ciddi tədbir görəsiniz”.
Hurriyyet.org


Paylaş: