“Dünən Milli Məclisdə Azərbaycan Respublikasının İnsan hüququları üzrə Müvəkkilinin 2019-cu il üzrə məruzəsini dinlədik.

Məruzənin Məktəbəqədər təhsil müəssisələrinin (uşaq baxçalarının) fəaliyyətindəki qüsurlar da yer almışdı”.

Cebhe.info-nun xəbərinə görə, bu barədə təhsil eksperti Etibar Əliyev bildirib:

“Əslində biz təhsil ekspertləri kimi uşaq baxçalarının Təhsil Nazirliyinin tabeçiliyinə verilməsi barədə dəfələrlə məsələ qaldırmışıq. Ombudsamanın hesabatında bu məsələnin yer alması probleminin tezliklə həll olunmasına ümidləri artırır. Həmin sənədin “Təhsil hüququ” bölməsində bildirilir:

“Müvafiq sahədə mövcud olan problemlərin əks edilidiyi müraciətlər üzrə aparılmış araşdırmalar, həmçinin müşahidələr göstərmişdir ki, həm uşaq baxçalarında mövcud yerlərinin sayı müvafiq ərazidə yaşayan məktəbəqədər yaşlı uşaqların sayına uyğun deyil, həm də uşaqların bu müəssisələrə qəbulu zamanı ciddi qanun pozuntularına və neqativ hallara yol verilməkdədir”.

Xüsusi olaraq qeyd edilməlidir ki, övladının aidiyyəti üzrə məktəbəqədər təhsil müəssisələrinə qəbul edilməsi ilə bağlı müraciət edən valideynlərə demək olar ki, hər bir halda imtina edilmişdir”.

Etibar Əliyev bildirir ki, ötən dövrlərdən etibarən məktəbəqədər təhsilə olan ehtiyacın yerli icra hakimiyyətləri tərəfindən düzgün qiymətləndirilməməsi, təmirə və yenidənqurmaya ehtiyacı olan mövcud baxçaların müasir tələblərə uyğunlaşdırılması üzrə tədbirlərin həyata keçirilməməsi narahatlıq doğurur.


Paylaş: