Sosial şəbəkələr texniki və məişət avadanlıqları satışı ilə məşğul olan mağazalar, xüsusən də, “Kontakt Home”dan şikayətlərlə doludur. Belə ki, həmin mağazalar şəbəkəsindən məhsul alan müştərilər müxtəlif problemlərlə üzləşdiklərini və mağaza filiallarının problemi həll etmədiklərini bildiriblər. Sosial mediada yayılan həmin şikayətlərdə alınan məhsulların xarab çıxması, qızıl zəmanət talonunun işə yaramadığı üstünlük təşkil edir. Əvvəllər də dəfələrlə müştərilərin "Kontakt Home"dan şikayət etməsilə bağlı mediada çoxlu sayda məlumatlara yer alıb. Amma təəssüf ki, adı çəkilən mağaza barədə hələ ki, hər hansı tədbir görülməyib.

Məsələ ilə bağlı Lent.az -a danışan Azad İstehlakçılar Birliyinin sədri Eyyub Hüseynov əsasən, "Kontakt Home"un servisində müştərilərin aldandığını deyib. Onun sözlərinə görə, rəhbərlik etdiyi təşkilata ən çox şikayət də məhz adı çəkilən mağazalar şəbəkəsindən gəlir:

“Son 5-6 ildə texniki avadanlıqlar, xüsusən də, mobil telefon satan mağazalardan çoxlu sayda şikayətlər gəlir. Əlbəttə heç bir şikayət gəlməyən bu cür şəbəkələr də var. Xüsusən, hansı mağazalar ki, məhsullarını kreditlə satır onlardan daha çox şikayətlər gəlir. "Kontakt Home"dan telefon alan müştəri bir neçə saatdan sonra görür ki, telefonun proqramları və ya keyfiyyəti ona uyğun deyil. Mağazaya gətirir ki, dəyişin yaxud qaytarın. Satıcı da işıqnan ekrana baxır ki, sən bunu cızmısan dəyişmərəm və servisə göndərir. Servis də baxır və müştərinin problemi həll olunmur. Belə çıxır ki, telefon ya satıcının, ay da servisdəki ustanın əlində cızılır. Bu cızıqsalma bicliyi "Kontakt Home"dan başladı və sonradan Baku Elektorinksə, ABC telekoma, Optimala və.s keçdi. Neçə ildi bu cür davam edir. Ona görə də, əziz alıcılar aldığınız telefona yeri gəlsə lupa ilə baxın, necə baxırsınız baxın. Çünki bu mağazalar şəbəkələri ya xarab, ay cızığı olan, ya da köhnə işlənmiş telefon satırlar. Dəyişmək və ya qaytarmaq istəyəndə də telefonu satıcıya verməyin”.

Birlik sədrinin sözlərinə əsasən, ən çox şikayət olunan "Kontakt Home" özünəməxsus mənfur taktikası ilə müştəriləri daim narazı salır. O həmçinin bildirib ki, adı çəkilən mağaza məhsul almağa gələn müştəriyə qapılarını gülərüzlə açdığı halda, problem yarandığı təqdirdə onu həll etmək qeyr-mümkünə çevrilir:

“Dünən də elə mənə bir nəfər şikayətə gəlmişdi. Demək 7 ay öncə vətəndaş "Kontakt Home"dən telefon alıb və 3 gün işlədib. Keyfiyyətsiz olduğunu görüb mağazaya gedib ki, dəyişsin. Ancaq servis ona bir kağız verib və telefonu özündə saxlayıb. 7 aydan sonra məhkəmə müştəriyə 700 manat təzminat cəzası təyin edib. AİB bu cür mağazalar şəbəkələrində gördüyü təcrübə əsasında deyə bilərəm ki, həmin mağazalar, servislər və məhkəmələr 3 muşketyor qanunu ilə işləyir: - Birimiz hamımız, hamımız birimiz üçün. Buna son qoymaq lazımdır. "Kontakt Home"dən məhsul alarkən qapıları açırlar, gülərüzlə qarşılayırlar. Mən təşkilat sədri olaraq, nə "Kontakt Home"nin nə hüquqşünası ilə, nə müavini ilə görüşmüşəm. Bilmirəm ki, onlar kimlərdir. Onlardan da şikayətlər də yağış kimi gəlir. Həmin mağaza bu prinsiplə işləyir – Pulunu ver mənə, itil cəhənnəmə. İstehlakçılar oradan rahatca mal ala bilir, amma problem olanda geri qayıtmağa yol yoxdur. Təəssüf ki, "Kontakt Home"nin bu mənfur təcrübəsi digər mağazalar şəbəkələrinə də yayıla-yayıla gedir. İnanıram ki, cənab prezidentin bir müddət öncəki qərarı ilə fəaliyyətə başlayan İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti bu problemlərə son qoyacaq. Dəfələrlə keçmiş nazir Şahin Mustafayevə, indiki nazir Mikayıl Cabbarova müraciət etmişəm ki, dəyirmi masa təşkil edib müştərilərin şikayətlərin, problemləri səsləndirək. Ancaq təəssüf ki, əhəmiyyət verilməyib”.





Paylaş: