Məcburi Köçkünlərin Sosial İnkişaf Fondu tərəfindən keçirilən tender müsabiqəsinin qalibi məlum olub.

Yeniavaz.com açıqlanan rəsmi məlumatlara istinadən bildirir ki, tender müsabiqəsinin qalibi “Fidan Baby” MMC (tərcüməsi “Fidan Körpə”- red.) olub. “Fidan Baby” MMC Kürdəmir və Ağcabədi şəhərlərində zəruri sosial-texniki infrastrukturu olan yeni yaşayış məhəllələrinə məcburi köçkün ailələrinin köçürülməsini həyata keçirəcək. Görüləcək işin qarşılığında “Fidan Baby” MMC Məcburi Köçkünlərin Sosial İnkişaf Fondundan 216 min 232 manat alacaq.

“Fidan Baby” MMC 100 min 777 manata 563 məcburi köçkün ailəsini Kürdəmir şəhərindəki yeni yaşayış məhəlləsinə, 115 min 455 manata isə 645 məcburi köçkün ailəsini Ağcabədi şəhərindəki yeni yaşayış məhəlləsinə köçürəcək.

Qeyd edək ki, daha əvvəl açıq internet resurslarda barəsində heç bir məlumat olmayan “Fidan Baby” MMC cəmi 6 ay əvvəl – 2019-cu ilin dekabr ayının 16-da dövlət qeydiyyatına alınıb. Məcburi köçkün ailələrinin köçürülməsi üçün adında “körpə” sözü olan 6 aylıq şirkətin bu sahədə hansı təcrübəyə sahib olması haqqında heç bir məlumat mövcud deyil.

Onu da bildirək ki, bu ilin may ayının 6-da Məcburi Köçkünlərin Sosial İnkişaf Fondu daha bir şirkəti “Baku Cleaning” MMC-yə (tərcüməsi “Bakı Təmizlik”- red.) analoji tenderin qalibi edib. “Baku Cleaning” MMC 23 min 270 manata 130 məcburi köçkün ailəsini Göygöl şəhərindəki yeni yaşayış məhəlləsinə, 44 min 750 manata isə 250 məcburi köçkün ailəsini Ucar şəhərindəki yeni yaşayış məhəlləsinə köçürəcək.

Tender müsabiqəsinin maraqlı tərəflərindən biri də odur ki, hər iki şirkət – həm “Fidan Baby” MMC, həm də “Baku Cleaning” MMC eyni gündə, eyni ünvanda, eyni şəxs tərəfindən, eyni nizamnamə kapitalı ilə qeydiyyatdan keçib.

Belə ki, həm “Fidan Baby” MMC, həm də “Baku Cleaning” MMC 16.12.2019-cu tarixində dövlət qeydiyyatına alınıb. Hər iki MMC-nin hüquqi ünvanı Bakı şəhəri, Suraxanı rayonu, Əmircan ŞTQ, Əli Bayramov (Əmircan Qəs.), ev 8, m 0 -da yerləşir. Nİzamnamə kapitalları 10 manat olan hər iki MMC-nin qanuni təmsilçisi Hacıyev Elmin Elçin oğludur.

Məlumat üçün onu da qeyd edək ki, Məcburi Köçkünlərin Sosial İnkişaf Fondu ötən ilin oktyabr ayında keçirdiyi tender müsabiqəsində də böyük qanunsuzluğa yol verib. Belə ki, Fond Ağcabədi rayonunun "Taxta Körpü" ərazisində müvəqqəti məskunlaşmış 1500 (I mərhələ - 645) məcburi köçkün ailəsi üçün zəruri sosial-texniki infrastrukturu olan evlərin, inzibati binanın, həkim məntəqəsinin, həmçinin məktəblərin tikintisini həyata keçirmək üçün 14 şirkətlə müqavilə imzalayıb. Lakin, məlum olub ki, həmin qəsəbələrdə tikinti işləri tender elanından daha əvvəl başlayıb və qaliblərin elan olunmasından qısa müddət sonra başa çatıb. Ağcabədi rayonunun Taxtakörpü ərazisində yeni salınan və ötən ilin sonunda istifadəyə verilən 645 ailəlik üç qəsəbənin inşası tender elan olunmadan qanunsuz şəkildə icra olunub.

Həmin yazını BURADAN ətraflı oxuya bilərsiniz.




Paylaş: