Şəki doğma yurdumuz Azərbaycanın dilbər guşələrindəndir. Buranın faunası özünəməxsus füsümkar gözəlliyi ilə seçilir. Ədəbiyyatımızda dramaturgiyanın əsasını qoyan Mirzə Fətəli Axundzadə, uşaq ədəbiyyatımızın görkəmli nümayəndəsi Abdulla Şaiq, azadlıq və müstəqilliyimizin carçısı Bəxtiyar Vahabzadə və onlarla dahi yetişdirib bu diyar.
Təəssüf, çox təəssüflər olsun ki, bu möhtəşəm diyar və onun duzlu, məzəli lətifələri ilə seçilən, özünəməxsus ləhcəsi olan yerli sakinləri son illərin acınacaqlı durumunu yaşamaqdadırlar.
İyulun 22-si, Azərbaycan Mətbuatının 145-ci ildönümündə Şəkiyə yağan güclü yağış bu şəhərin son illər yarıtmaz idarəçiliyinin acı nəticələrini ortaya qoydu. İki-üç ildir ki, Şəkinin kanalizasiya sistemi yenilənir, küçələr qazılıb bərbad vəziyyətdədir. Əgər Şəkinin icra başçısı Elxan Usubovun başı şəxsi biznesini idarə etməkdən və sərvət toplamaqdan açılsaydı şəhərin arxlarını və bərələrini vaxtında təmizlədib sahmana salardı ki, Şəki camaatı da iyulun 22-də yağan güclü yağışın acısını dadmazdı. İndi Şəki camaatını düşündürən əsas məsələlərdən biri də kanalizasiya xətlərinin yarıtmaz vəziyyətinin üzə çıxmasıdır. Camaat deyir ki, hanı təzə çəkilən kanalizasiya xətti? Niyə yağış suları yeni çəkilmiş kanalizasiya xətti ilə yox, küçənin ortası ilə axırdı??? Əlbəttə ki. camaat haqlıdır. Deyilənə görə Şəki şəhər İcra Hakimiyyətinin başçısı cənab Elxan Usubov Şəkiyə icra başçısı təyin olunduğu 2011-ci ildən keçən 9 il müddətində şəhərin demək olar ki, "qara günləri" başlayıb. Bu adam vəzifə səlahiyyətlərindən sui-istifadə edərək şəhərin tarixi abidələrinin zirzəmilərini müxtəlif kafe və çayxana sahiblərinə satıb. Elxan Usubov vəzifəyə bacarıqlı, camaat içində kifayət qədər hörməti olan, mütəxəssis kadırlar yerləşdirmək əvəzinə, ona son dərəcə sədaqəti və məddahlığı ilə seçilənləri gətirir.
Türkiyəli müğənni Petek Dinçözə Şəkidə torpaq vəd etməsi ilə gündəmə gələn Elxan Usubovun həm Ağstafa, həm də Şəki şəhər İcra Hakimiyyətinin başçısı işlədiyi vaxt vəzifə səlahiyyətlərindən sui-istifadə edib topladığı göz qamaşdıran varidatından yazmamaq olmur. Belə ki, İcra başçısı Elxan Usubovun Şəkidə bir neçə iaşə və ticarət obyektləri, yaşayış sahələri və hektarlarla torpaq sahələri olduğu bildirilir. Cənab Elxan Usubovun Bakıda, Ağstafada, hətta qonşu Gürcüstandakı böyük fındıq zavodu və milyonlarla manat dəyəri olan mülk və obyektləri ilə yanaşı Şəkidə iki mənzil, beş dəbdəbəli malikanə, Şəkidəki süd zavodu, "Sünbül" çörək bişirmə sexi, Axundov prospektindəki "Şəki" hoteli, Kiş kəndinə "Şam bağı, Narınqala, Cənnət bağı," hotelləri, Dağ üstü park deyilən yerdə "Panarama" hoteli, Şəki-Oğuz yolunun üstündə yerləşən bir neçə ticarət mərkəzləri və siyahısı uzanan digər obyektləri olduğu bildirilir. İndi əksər Şəkili işlədiyi müddətdə başı varidat yığmağa, sərvət toplamağa qarışmış cənab Elxan Usubovun əyləşdiyi Şəki Şəhər İcra Hakimiyyətinin binasına tezliklə "qara masqalı" uşaqların təşrif buyurmasını səbirsizliklə gözləyirlər. Aşağıdakı video görüntüdə iyulun 22-də Şəkiyə yağan güclü yağışın acı fəsadlarıdır.
İlqar MƏHƏRRƏMLİ- Conflict.az


Paylaş: