Son bir həftə ərzində 190 manat birdəfəlik ödəmə ilə bağlı Gözətçi İnsan Hüquqları Portalına Azərbaycanın müxtəlif bölgələrindən şikayətlər daxil olub. Şikayətlərin bir çoxunda aztəminatlı vətəndaşlara verilən birdəfəlik ödəmədən qanunsuz olaraq müxtəlif bəhanələrdə imtina edildiyi qeyd edilib.

Gəncə sakini Amil Allahverdiyev Gözətçiyə bildirib ki, 190 manat birdəfəlik ödəməni almaq üçün qeydiyyatdan keçsə də aztəminatlılıq meyarına uyğun gəlmədiyi əsas gətirilərək rədd cavab alıb. Amil Allahverdiyevin sözlərinə görə karantindən əvvəl işlədiyi şadlıq sarayı onun yeganə gəlir yeri olub . Pandemiya dönəmində şadlıq saraylarının fəaliyyətini dayandırmasına, onun işsiz kimi qeydiyyata alınmasına baxmayaraq, heç bir səbəb göstərilmədən ona 190 manat birdəfəlik ödəmə verilməsindən imtina edilib. Gəlir yerinin olmadığını və bu müddət ərzində ailəsini dolandırmaqda çətinlik çəkdiyini deyən vətəndaş şikayəti ilə bağlı dəfələrlə DSMF-ə və Məşğulluq Mərkəzinə müraciət etdiyini lakin hər hansısa tədbir görülmədiyini bildirir.

Gəncə şəhər, Məhsəti qəsəbə sakini Aynur Əliyeva da birdəfəlik ödəmədən səbəb göstərilmədən məhrum olduğunu bildirir. O deyir ki, bu ilin aprel ayında Məşğulluq Mərkəzində işsiz kimi qeydiyyatdan keçib. Lakin bu günə qədər ona nə 190 manatın verilməsi, nə də imtina olunması ilə bağlı məlumat gəlməyib. Vətəndaş Əmək və Əhalinin Sosial Müdafiəsi Nazirliyinin 142 Çağrı Mərkəzinə müraciət etdikdə ona bildirilib ki, şikayəti ilə bağlı Nazirliyin Apellyasiya Şurasına müraciət etsin. A. Əliyeva adıçəkilən quruma rəsmi müraciət etdiyini lakin hələ də ona hər hansısa məlumatın bildirilmədiyini deyir.

Gəncə sakini Raya Şərifova isə birdəflik ödəməni almaq üçün heç bir səbəb göstərilmədən aztəminatlılıq meyarına uyğun gəlmədiyi cavabını alıb.

Göyçay rayonunda da bir neçə sakin oxşar problemlərlə qarşılaşıb. Vətəndaş Aqil Məmmədov bildirir ki, 190 manat birdəfəlik ödəməni almaq üçün ona təsdiq mesajı gəlsə də bu məbləği ala bilməyib. Göyçay da yerləşən Kapital bankdan sakinə bildiriblər ki, pul hesabına köçürülüb. Lakin vətəndaş hələ də kartı bankdan əldə edə bilməyib.

Göyçay sakini Samir Qədirov isə deyir ki, 190 manat üçün müraciətinə müsbət cavab gəlsə də Ağdaş poçtunda ona pulun götürülmüş olduğu bildirilib.

Rayon sakini Teymur Niftalıyev isə deyir ki, birdəfəkik ödəmə üçün müraciətinə avtomobil sürmə etibarnaməsi olduğu əsas gətirilərək imtina cavabı gəlib.

Göyçay sakini Günay Azayeva isə bildirir ki, 190 manat birdəfəlik ödəmə üçün qeydiyyatdan keçib, təsdiq mesajı alsada məbləğin özünü hələ də əldə edə bilməyib. Göyçay sakinləri şikayətləri ilə bağlı 142 qaynar xəttinə, Əmək və Əhalinin Sosial Müdafiəsi Nazirliyinə müraciət etdiklərini lakin müraciətlərinə hələ də cavab verilmədiyini bildirirlər.

Beyləqan şəhər sakini Sərxan Allahverdiyev isə deyir ki, karantindən əvvəl Beyləqan-Bakı maşrutu üzrə sürücü kimi fəaliyyət göstərib. Karantin müddətində fəaliyyətinə qadağa qoyulsa da 190 manat birdəfəlik ödəmə ala bilməyib.

Sakin Əbülfət Qələndərov da bildirir ki, karantindən əvvəl şadlıq evində video operator kimi fəaliyyət göstərib. Şadlıq evi karantin dövründə fəaliyyətini dayandırsa da, 190 manat birdəfəlik ödəmənin ona verilməsindən səbəb göstərilmədən imtina edilib.

Bəyləqan sakini Xatirə Əliyeva isə deyir ki, işsiz olduğu halda özünün xəbəri olmadan Beyləqan vergi idarəsində adına VÖEN açıldığına görə birdəfəlik ödəməni ala bilməyib. Vətəndaş şikayəti ilə bağlı Beyləqan məşğulluq idarəsinə və Beyləqan Vergi idarəsinə müraciət etsə də müraciətlərinə hələ də cavab verilmədiyini bildirir.

Kürdəmir şəhər sakinləri Aqil Baloğlanov, Elşad Hacıyev, Vüsalə Hüseynova, Qoşqar Hüseynov da Gözətçiyə etdikləri şikayətdə 190 manat birdəfəlik ödəməni oxşar səbəblər göstərilməklə ala bilmədiklərindən şikayətlənirlər. Vətəndaşlar bildirir ki, məsələ ilə bağlı müvafiq qurumlara müraciət etsələr də şikayətləri ilə bağlı hər hansısa tədbir görülməyib.


Paylaş: