Ölkə başçısı İlham Əliyev ötən gün Biləsuvar və Saatlı rayonlarına təyin etdiyi yeni icra hakimiyyəti başçılarını videoformatda qəbul edib.

Prezident bildirib ki, özlərinə və ya hansısa bir məmura yox, dövlətə, vətənə sadiq məmurlar irəli çəkilməlidir. Milli düşüncəli adamlara vəzifə vermək lazımdır.

Nəzərə alsaq ki, hakimiyyətin təşəbbüsü ilə iqtidar-müxalifət dialoqu da gedir, Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev müxalifət partiyalarının rəhbərləri ilə görüş keçirir, Prezidentin çıxışından sonra müxalif düşüncəli milli kadrların da dövlət vəzifələrinə təyin olunması istisna edilmir.

Maraqlıdır, hakimiyyət komandası müxalifətə (dağıdıcı və ya “5-ci kolon”a bağlı olanlar istisna olmaqla-red.) müəyyən dövlət vəzifələri təklif edə bilərmi? Müxalifət təmsilçiləri belə bir təyinat gözləyirmi?

“Aşağı keyfiyyətli idarəetmədən imtina edilir”

Azərbaycan Demokrat Partiyasının (ADP) Sərdar Cəlaloğlu Cebhe.info-ya açıqlmasında bunun gözlənilən olduğunu deyib:

“Prezidentin çıxışı da məhz bunu göstərir. Əslində İlham Əliyevin bu bəyanatı göstərir ki, Azərbaycanda artıq aşağı keyfiyyətli idarəetmədən imtina edilir. Yəni məmura sadiq, vətənə, millətə, dövlətə düşmənçilik siyasətindən imtina olunur. Təbii ki, yeni siyasətdə də hakimiyyətdə yüksək keyfiyyətli insanlar təmsil oluna bilər. Bu baxımdan islahatçı, millətçi, demokratik, sədaqətli qüvvələr, xalqını, millətini sevən, öz sahəsini bilən, savadı, səriştəsi olan insanların hakimiyyətdə təmsilçiliyinə şərait yaranır. Prezidentin mövqeyi tamamilə düzgündür, alqışlayıram. Bu, təkcə Azərbaycanda “5-ci kolon”a qarşı mübarizə yox, həm də uzun illər hakimiyyətdən kənar saxlanılan istiqlalçı, milli qüvvələrin də hakimiyyətdə təmsil olunmasına qapı açır”.

“Kadrlar eyni zamanda milli düşüncəli olmalıdır”

Milli Cəbhə Partiyasının (MCP) Siyasi Şurasının üzvü Rafiq Daşdəmirli də Prezidentin bu təşəbbüsünü dəstəklədiklərini deyib:

“Bizim də partiya olaraq bir müddət əvvəl bel təkifimiz olub. Neçə illərdir deyirik ki, dövlət vəzifələrinə milli, vətənini, xalqını sevən insanlar gətirilməlidir. Savadlı kadr yaxşıdır, amma o, eyni zamanda milli düşüncəli olmalıdır. Çox yaxşı olar ki, siyasi və iqtisadi islahatlar tezləşdirilsin. Hakimiyyət öz komandasının tərkibində müxalifətə də yer versin. Yerlərdə icra hakimiyyətlərində müxalifətin təmsil olunması, seçikilərdə partiya təsisatlarının bölünməsi, yerli strukturların hər birində müxalif təmsilçilərin olması daha uğrulu olardı. Belə olan halda, rüşvətxorluğun kökü kəsilər, qurumlarda keyfiyyətli fikir mübadiləsi gedər. Prezidentin bu təşəbbüsünü dəstəkləyirik”.

“Belə ehtimal çox azdır”

Ağ Partiyanın sədri Tural Abbaslı isə müxalif şəxslərə vəzifə veriləcəyinə inanmadığını qeyd edib:

“Bu günə qədər hakimiyyətin praktikası onu deməyə əsas verir ki, belə bir ehtimal çox azdır. Hətta Prezident özü bunu bəyan etdiyi halda belə, amma yenə Yeni Azərbaycan Partiyasına, hakimiyyətin orbitinə yaxın olan insanları vəzifəyə təyin edirlər. Bir çox müxalifətçilər var ki, regional miqyasda böyük hörmətə sahibdir. Amma müxalif mövqedə və ya hakimiyyətə bitərəf olduğu üçün yerli icra orqanlarında təmsil olunmaq şansı verilmir. Bu günə qədər hakimiyyətin düşüncəsində olmayan, onun siyasətini birmənalı olaraq dəstəkləməyən heç bir şəxsə məhsuliyyətli vəzifə verilmir. Boş qalmış İcra Hakimiyyəti başçısı postlarına və ya çıxarılacaq icra başçılarının yerinə YAP üzvü, orada vəzifə tutmuş insanlar yox, sırf müxalif düşüncəli, bitərəf gənclərdən təyin etsinlər. Biz də görək ki, hakimiyyətin kursunu birmənalı şəkildə dəstəkləməsə də, dövlətə, vətənə, millətə bağlı insan olduğu üçün mükafatlandırıldı. Hələlik bu məsələyə inanmıram, amma belə bir fikir varsa, buyursunlar, bunu sübut etmək üçün onların kifayət qədər şansı var. Bu günə qədər nəinki təyinatlı, seçkili orqanda belə müxalifətin təmsilçiliyinə dözümsüz yanaşılıb. İndi kursu, xətti dəyişiblərsə, buyursunlar, müxalifətə, bitərəflərə şans versinlər. Biz də görək ki, vətənə, millətə, dövlətə bağlı adamlara məsuliyyətli iş tapşırdılar”.

“Kadrları potensialına görə seçmək lazımdır”

Azərbaycan Milli İstiqlal Partiyasının (AMİP) Mərkəzi Şurasının üzvü Əli Orucov isə hesab edir ki, müxalif şəxslərin imkanlarından istifadə etmək hakimiyyət üçün də faydalı olar:

“Prezidentin yeni təyinatları qəbul edərkən etdiyi çıxış həqiqətən də çox diqqət çəkdi. Ölkə başçısı hər dəfə bu cür kadrları yeni vəzifəyə təyin edərkən tövsiyələrini verir, tələblər qoyur. Amma təəssüf ki, bir sıra hallarda bu tələblər, tövsiyələr yerinə yetirilmir. Neqativ hallar-korrupsiya, rüşvət, qohumbazlıq, yerlibazlıq, şəxsə sadiqlik kimi məsələlər qalmaqdadır. Bunu da qısa müddətdə həll etmək çətindir, amma bunun üzərinə gedilməlidir. Dəfələrlə demişik ki, kadrları kiməsə bağlılığına, yaxınlığına görə deyil, onu potensialına görə seçmək lazımdır. Müxalifətdə çox savadlı, seçilmiş kadrlar var, onların imkanlarından istifadə etmək faydalı olar. Şərt deyil ki, onlara icra strukturlarında hansısa vəzifə verilsin, onlara öz imkanlarını üzə çıxarması üçün şərait yaradılmalıdır. Məsələn, müxalifətin bu günə qədər hakimiyyətə verdiyi təkliflərin belə nəzərə alınması əhəmiyyətli olardı. Hər halda düşünürəm ki, ümumiyyətlə, iqtidar-müxalifət münasibətləri yenilənməlidir, yeni baxış gəlməlidir”.


Paylaş: