Müsavat Partiyasının rəhbərliyinə daxil olan şəxslər Qarabağ Komitəsindəki Müsavat üzvlərinin istefa verməsini istəyir. Bu barədə əldə etdiyimiz xəbərdə deyilir ki, məsələ hətta partiyanın rəhbər orqanlarında müzakirə edilib və Qarabağ Komitəsində olan Müsavat Partiyası üzvlərinə “ya partiya, ya da Qarabağ Komitəsi” seçimi ilə bağlı xəbərdarlıq edilib. Qarabağ Komitəsindən çıxmayanların Müsavat sıralarından xaric ediləcəyi deyilir.

Müsavat Partiyasının Məclis üzvü, Müsavat Partiyası Qarabağ Komissiyasının sədri, Qarabağ Komitəsinin İdarə Heyətinin üzvü Şakir Abbasovla əlaqə saxlayıb, yayılan xəbəri dəqiqləşdirməyə çalışdıq.

Şakir Abbasov musavat.com-a bildirdi ki, Qarabağ Komitəsindən çıxmaqla bağlı Müsavatdan rəsmi qaydada tələb olmayıb: “Rəsmi qərar və tələb yoxdur. Amma ordan-burdan qulağıma belə söhbətlər gəlib çatır ki, Müsavatda bəzi adamlar bu cür məsələləri qoyurlar. Həttta şifahi şəkildə dilə gətirilirsə belə, bu, qətiyyən Müsavatın adına yaxşı hal olmaz. Müsavat Partiyası üçün Qarabağ məsələsi bir nömrəli məsələdir və şəxsən mən Müsavat Partiyasının Qarabağ Komissiyasının sədriyəm. Əlbəttə ki, mənim Qarabağ Komitəsində həm Müsavat Partiyasının Qarabağ Komissiyasının sədri, həm bir müsavatçı, həm də torpağı işğal altında olan bir vətəndaş kimi olmağım təbiidir, vacibdir. Buna qarşı çıxmaq qətiyyən düzgün olmaz. Məndən başqa da Qarabağ Komitəsində müsavatçılar var.

Müsavat Məclisinin son iclasında Tofiq Yaqubluya qarşı belə bir söhbət oldu. Tofiq bəyin Milli Şuradan çıxmasının vacibliyi ilə bağlı məsələ qaldırıldı. Deyildi ki, Tofiq Yaqublu ya Milli Şuradan çıxsın, ya da partiyadan getsin. İndi bu mövqedə olanlar bizim də Qarabağ Komitəsindən çıxmağımızı istəyirlərsə, yaxşı mövqedə deyillər. Şəxsən mənə hələ belə bir tələb rəsmən deyilməyib. Amma xəbərlər sızır. Hətta rəsmi deyilsə də, mənim Qarabağ Komitəsindən çıxmaq fikrim yoxdur. Biz torpağımızın davasını edirik. Bu davanı aparan bir qurumda olmağımın Müsavata hər hansı bir ziyanı yoxdur. Mən həmişə məsələ qaldırmışam ki, imkan verin, bütün normal qurumlarda iştirak edək. Bu, nə deməkdir ki, mən filankəslə küsülüyəm, sən də küsülü ol. Bu, düzgün yanaşma deyil”.

Qarabağ Komitəsinin təsisçilərindən olan Tural Abbaslı isə bildirdi ki, Müsavatın belə bir qərar verməsi doğrudursa, bu, Qarabağ məsələsinə xəyanət olar.


Paylaş: