Xətai rayonu, Gəncə prospekti 2942A məhəlləsində tikintisi dayandırılan binanın kommunikasiya xətlərinin çəkilməsi üçün başladılan işlərin qarşısı alınıb.

Bunu Axar.az-a açıqlamasında Xətai rayon İcra Hakimiyyətinin İctimai-siyasi və humanitar məsələlər şöbəsinin müdiri Pənah İmanov deyib. O bildirib ki, vətəndaşların şikayəti əsasında ərazidə araşdırma başlayıb:

“Hansısa binanın tikilib-tikilməyəcəyi ilə bağlı icazə məsələsi Dövlət Şəhərsalma və Arxitektura Komitəsinin nəzarətindədir. Bununla bağlı araşdırmanı aparan qurum onlardır. Xətai İH-nin tikintiyə icazə vermək səlahiyyəti yoxdur. Vətəndaşların şikayətiylə əlaqədər biz məsələni araşdırdıq. Həqiqətən də ərazidə kommunikasiya xətlərinin çəkilməsi ilə bağlı hərəkətlənmə olmuşdu. Dərhal bunun qarşısı alındı. İndi ərazidə işlərin görülməsi dayandırılıb və məsələ nəzarətimizdədir”.

Məsələ ilə bağlı saytımız tərəfindən Dövlət Şəhərsalma və Arxitektura Komitəsinə sorğu göndərilib.

Qeyd edək ki, bu ilin əvvəlindən Xətai rayonu, Gəncə prospekti 2942A məhəlləsində kiçik ərazidə göydələn tikilməsi üçün işlər başladılmışdı. Ciddi sıxlıq yaşanan kiçik ərazidə prospektə birbaşa çıxışı olmayan növbəti göydələn tikintisinin həddən artıq ciddi problemlərə yol açacağı üçün sakinlərin etirazından sonra tikinti dayandırılsa və Xətai İH ərazidə kiçik park salınmasını vəd etsə də, ötən gündən yenidən tikintiyə cəhd edilmişdi.

Tikintini Qaya-İnşaat MTN aparır.


Paylaş: