Azərbaycanda preslənmiş sərt xəmir maya istehsalçısı “Azər-Maya” ASC-nin idarə olunması yeni şəxsə tapşırılır.

regionxeberlericom.az Banker.az-a istinadən xəbər verir ki, ölkənin ən böyük holdinqi “Gilan Holdinq”in İdarə Heyət sədrinin 1-ci müavini Rüfət Əhədağa oğlu Məmmədov “Azər-Maya”nın İdarə Heyətinə sədr (CEO) təyin edilib.
Buna qədər isə “Azər-Maya”nın İdarə Heyətinin sədri Etibar Hidayət oğlu Babayev idi.

R.Məmmədov Azərbaycanın Tibb Universitetində mikrobioloq kimi magistr dərəcəsinə 2007-ci ildə yiyələnib. 2020-ci ildə İsveçrənin Montre Biznes Məktəbində MBA dərəcəsinə yiyələnib.

O, iş karyerasına yüksəlişə Danimarkanın Bakıdakı pivə istehsal edən törəmə şirkəti “Carlsberg Azerbaijan” şirkətində 2010-cu ildə direktor müavini kimi yiyələnib. İki il sonra, yəni 2012-ci ilin sentyabrında zavod direktoru təyin edilib.

Üç il sonra (2015 – sentyabr) “Gilan Holdinq”-ə Əməliyyat direktoru kimi gəlmiş, 2016-cı ilin noyabrından 2020-ci ilin sentyabrna qədər isə həmin holdinqdə İdarə Heyəti sədrinin (CEO) 1-ci müavini kimi təyin edilmişdi.

“Azər-Maya” Bakı şəhəri, Nərimanov rayonu, Dərnəgül qəsəbəsi,Dağlıq küçəsi, 3105-ci məhəllədə fəaliyyət göstərir.

1973-cü ildə fəaliyyətə başlamış keçmiş Bakı Bulka-Maya zavodunun bazasında 1997-ci ilin may ayında tam özəlləşdirilmiş müəssisə olan “Azər – Maya” Açıq Səhmdar Cəmiyyəti yaradılmışdır. Hazırda ASC-nin direktoru Şahbazov Azər Firudin oğludur.

“Azər-Maya” ASC istehsal etdiyi preslənmiş xəmir mayası ilə Azərbaycanın tələbatını ödəməklə yanaşı qonşu dövlət olan Gürcüstan Respublikasına da ixrac edir.

04.12.2020-ci il tarixində redaksiyanızda “Gilan Holding”- in də adının keçdiyi xəbər dərc edilmişdir. Xəbərdə keçmiş əməkdaşımız olan Rüfət Məmmədovun “Azər-Maya” ASC-ə keçməsi öz əksini tapmışdır. Lakin, bildirmək istərdik ki, paylaşılan xəbərdə məlumat səhv qeyd olunmuşdur. Keçmiş əməkdaşımız olan Rüfət Məmmədov “Gilan Holding”- ə daxil olan biznes portfellərinin birinin müdir müavini vəzifəsini icra etmişdir. Xəbərin başlığında və içərisində qeyd olunan “Gilan Holding”- in Sədr müavini vəzifəsində çalışması həqiqəti əks etdirmir.

Xahiş edirik ki, tərəfimizdən sizə bildirən bu məqamları nəzərə alaraq xəbərin başlığında və içərisində qeyd olunan məlumatları dəyişəsiniz. Həmçinin, bu tipli məlumatları gələcəkdə dəqiqləşdirməmiş dərc etməməyinizi xahiş edirik.

Anlayış göstərəcəyinizə ümid edir, işlərinizdə uğurlar arzulayırıq.



Paylaş: