“Pandemiya şəraitində 80 min yeni iş yeri yaradılıb”.

İqtisadiyyat naziri Mikayıl Cabbarov “Azərbaycanda Xarici Biznes 2020” hesabatının təqdimatında belə deyib.

O, martın əvvəlindən indiyədək Azərbaycanda təxminən 80 min yeni iş yerinin açıldığını söyləyib.

Demokratiya və Rifah Hərəkatının sədri, iqtisadçı Qubad İbadoğlu deyir ki, o iş yerlərinin bir hissəsi SMS icazənin “nəticəsi”dir.

Nazirlər Kabineti Azərbaycan ərazisində müəyyən edilmiş xüsusi karantin rejimi dövründə işlərin davam etdirilməsi zəruri olan fəaliyyət sahələrinin siyahısını təsdiq edəndən sonra bir çox müəssisələr "iş yerləri" yaratmaqla məşğuldur:

“Bu iş yerlərinin bir çoxu əvvəllər də olub. Sadəcə passiv xarakter daşıyıb, icazə ilə əlaqədar olaraq aktivləşdirilib. Yaxşı olar ki, İqtisadiyyat Nazirliyi yeni yaradılmış “iş yerləri”nin xüsusi karantin rejimi dövründə işlərin davam etdirilməsi zəruri olan fəaliyyət sahələri və zəruri olmayan fəaliyyət sahələri üzrə qruplaşdırsın. Onda məlum olacaq ki, yeni yaranmış “iş yerləri” nəyin hesabınadır”.

İqtisadçı deyir ki, bu ilin aprel ayından Əmək və Əhalinin Sosial Müdafiəsi Nazirliyinin Məşğulluq Xidmətində qeydiyyata duran işsizlərin sayı açıqlanmır.

Bu fakti "nailiyyət" kimi təqdim etməklə yanaşı, bağlanan iş yerlərinə dair məlumatlar da açıqlanmalıdır ki, mənzərə tam aydın olsun: “Görünür ki, müvəqqəti (2 aylıq) ödənişli ictimai işlərə (onların 90 minə çatdırılması nəzərdə tutulurdu, görəsən onların neçə mini troldur) və özünüməşğulluq proqramına cəlb edilənlər də ailəliklə yeni yaradılmış "iş yerlərinin" siyahısına daxil edilib. Bundan əlavə, Əmək və Əhalinin Sosial Müdafiəsi Nazirliyi inzibati vasitələrlə muzdlu işçilərin işdən çıxarılmasına maneçilik törədir. Eyni zamanda, VÖEN-i bağlamaq da uzun və çətin bir prosesə dönüb”.

Qubad İbadoğlu deyir ki, hətta bir çox müəssisələrdə işdən çıxmalı olan işçilər "məcburi məzuniyyətə" göndərilməklə onların işdən azad edilməsi prosesi ləngidilir.


Paylaş: