“Bizə digər universitetlərin güzəştləri ilə yaxınlaşmayın, unutmayın ki biz tələbələrə təhsil vermək istəyirik” – Azərbaycan Dövlət Neft Sənayesi Universiteti (ADNSU) rektoru Mustafa Babanlı.

NOCOMMENT.az tələbələrin ADNSU-nun rektoru Mustafa Babanlının açıqlamasına etirazını təqdim edir:

“Burda “rektor” Mustafa Babanlı qeyd edir ki, “bizə digər universitetlərin güzəştləri ilə yaxınlaşmayın, unutmayın ki, biz tələbələrə təhsil vermək istəyirik”.

Sizə sual verirəm Mustafa Babanlı!

Siz demək istəyirsiniz ki, Azərbaycanda fəaliyyət göstərən və qış imtahan sessiyası ilə bağlı tələbələrə güzəşt edən universitetlər tələbələrə təhsil vermək üçün fəaliyyət göstərmir?

Əgər elədirsə onlar nəyə xidmət edirlər? Sizin digər ali təhsil müəssisələrinə qarşı belə qərəzli mövqeyiniz qəbuledilməzdir!

Bir “rektor”un bunu deməyi digər ali təhsil müəssisələrini təhqir etmək deməkdir! Özünüzü bir nömrəli “rektor” rəhbərlik etdiyiniz universiteti bir nömrəli “universitet” kimi göstərməyə çalışmayın! Xalqın gözü tərəzidir deyirlər. Xalq nəyin necə olduğunu yaxşı bilir.

Mən sizdən bir Azərbaycan gənci, Azərbaycan gəncliyinin nümayəndəsi kimi tələb edirəm ki, digər ali təhsil müəssisələrinə qarşı ifadələrinizdə diqqətli olasınız.

ADNSU tələbələrinə siz digər universitetlərin güzəştləri ilə bizə yaxınlaşmayın, unutmayın ki, biz tələbələrə təhsil vermək istəyirik deməyiniz mövcud vəziyyətə görə çox gülünc bir ifadədir.

Koronavirus bütün dünyanı cənginə alıb aparır. SSRİ təhsil sistemi ilə fəaliyyət göstərən təhsil sistemimiz günü-gündən məhv olmağa doğru gedir. Distant (məsafədən) təhsil sistemi ilk dəfədir ki, ali təhsil müəssisələrində istifadə edilir. Təhsil sisteminin vəziyyətinə baxın, sonra “bizə digər universitetlərin güzəştləri ilə yaxınlaşmayın unutmayın ki, biz tələbələrə təhsil vermək istəyirik” deyərsiniz.

Hələ də SSRİ sistemindən çıxa bilməyən təhsil sistemimizi öz SSRİ təfəkkürünüz ilə daha da məhv etməyin!

Sizin o dediyiniz “bəzi universitetlər”in rektorları sizdən fərqli olaraq SSRİ təfəkküründən çıxmağı bacarıblar və mövcud vəziyyətə görə sağlam düşünürlər. Sağlam düşündüklərinə görə də haqq və ədalət prinsipləri əsasında qərarlar qəbul edirlər. Özünüzə bir baxın, rəhbərlik etdiyiniz universitetin tələbələrinə baxın. Görün onlar nə vəziyyətdədirlər. Siz tələbləri, Azərbaycan gəncliyini düşünmürsünüz.

Mövcud vəziyyətdə onlara dəstək olmaq əvəzinə öz çıxışlarınız ilə onlarda sizə qarşı nifrət eyni zamanda ruh düşkünlüyü yaradırsınız. Dönün baxın ki, nələr edirsiniz? Sonu nə olacaq? Bunları düşünün. Sonra qonşunun bostanına daş atarsınız…

“Hörmətli”, “Rektor” Mustafa Babanlıya çatdırın… Əminəm ki, cavabı da yuxarıdakı açıqlama kimi gülünc olacaqdır”.

Qeyd edək ki, qarşı tərəf ilə əlaqə saxlamaq cəhdlərimiz baş tutmadı. Universitet rəhbərliyinin də mövqeyini işıqlandırmağa hazırıq.


Paylaş: