“Ən azı müəyyən yaş qrupu üzrə uşaqpulunun verilməsi məqsədəuyğundur”.

Gələn ilin dövlət büdcəsində sosialyönlü xərclərin 5,3 faiz artırılması nəzərdə tutulur. Məlumata əsasən, 2021-ci il üçün dövlət büdcəsinin sosialyönlü xərcləri (büdcə xərclərinin iqtisadi təsnifatına uyğun olaraq əməyin ödənişi, pensiya və müavinətlər, dərman, sarğı ləvazimatları və materiallarının, ərzaq məhsullarının alınması xərclərinin cəmi) 11111,9 milyon manat məbləğində proqnozlaşdırılıb ki, bu da 2020-ci illə müqayisədə 563,8 milyon manat və ya 5,3 faiz çoxdur.

Büdcədə sosialyönlü xərclərin artırılmasını Yenicag.az-a dəyərləndirən “Sağlam Toplum” İctimai Birliyinin sədri, sosioloq Lalə Mehralının sözlərinə görə, ayrılan vəsait əsasında uşaqpulunun bərpa olunması arzuediləndir:

“Ayrılan vəsaitə uyğun olaraq, uşaqpulunun bərpa edilməsi müsbət hal olar. Ən azı müəyyən yaş qrupu üzrə uşaqpulunun verilməsi məqsədəuyğundur.

Düzdür, hazırda uşaqpulunun bərpası ilə bağlı müzakirələr gedir. Ancaq nəticənin necə olacağı məlum deyil. Bütün hallarda 0-18 yaşarası olmasa da, 0-3, 0-7 və ya 0-15 yaşarası uşaqlara vəsait ayrılması mümkün ola bilər.

Eyni zamanda, sosial müavinət və pensiyaların artımı ilə bağlı məsələləri də yenidən gözdən keçirmək olar”.


Paylaş: