İcbari tibbi sığorta fondunun vəsaiti hesabına tibbi sığorta xidmətlərinin göstərilməsi daha 1 il əlavə dəyər vergisindən (ƏDV) azad edilib. Bu, Prezident İlham Əliyevin bu gün təsdiqlədiyi Vergi Məcəlləsinə təklif edilən dəyişiklikdə əksini tapıb.
Qeyd edək ki, qüvvədə olan qanuna əsasən (164.1.51-ci maddə), icbari tibbi sığorta fondunun vəsaiti hesabına tibbi sığorta xidmətlərinin göstərilməsi 2020-ci il yanvarın 1-dən 1 il müddətinə ƏDV-dən azaddır.
Dəyişikliyə əsasən, bu müddət daha bir il artırılır. Beləliklə, icbari tibbi sığorta fondunun vəsaiti hesabına tibbi sığorta xidmətlərinin göstərilməsi 2020-ci il yanvarın 1-dən 1 il deyil, 2 il müddətinə ƏDV-dən azad olacaq.

İqtisadçı-ekspert Natiq Cəfərli “Sherg.az”a açıqlamasında dəyişikliyin əhəmiyyətini belə qiymətləndirib:

“Azərbaycanda icbari tibbi sığortanın tam tətbiqi ilə bağlı problemlər yaşanır. Onların birdəfəlik həlli üçün müxtəlif təşviq proqramları qəbul edilməlidir. Sığorta xidmətinin ƏDV-dən azad olunması da belə addımlardan biridir. Nəticədə konkret xidmətdən istifadəyə maraq yaranar”.

N. Cəfərli, həmçinin məsələnin daha optimal icrası ilə bağlı təklif də etdi:

“İcbari tibbi sığortanın gələcəkdə ƏDV-dən azad olunması istisna deyil. Amma bu, fors-major olar. Ona görə də, məncə, müddət qabacaqdan müəyyənləşməlidir. Məsələn deyilməlidir ki, icbari tibbi sığorta üç il müddətinə ƏDV-dən azaddır. Bu, daha effektli nəticə verər. Çünki həm sığorta şirkətləri, həm iş adamları, həm də tibb müəssisələri işlərini bilər və qabaqcadan planlaşdırarlar.”


Paylaş: