Son günlər sosial şəbəkələrdə, müxtəlif informasiya saytlarında Qusar rayonunda dəfn edilmiş şəhidlərin məzarlarının düzəldilməməsi, qəbirüstü daşların hazırlanmaması ilə bağlı informasiyalar yayılır, bu barədə müxtəlif rəy və fikirlər səsləndirilir. Bəzi saytlarda Qusar rayonunun Həsənqala kəndindən olan şəhid İsmayılov Orxan Qədim oğlunun məzarının fotoşəkli yerləşdirilmiş və Qusar rayonunda şəhid məzarlarına və şəhid ailələrinə laqeyd və biganə münasibət bəsləndiyi qeyd edilmişdir. Rayon İcra Hakimiyyəti bildirir ki, rayondakı bütün şəhid ailələri, eləcə də qazilər və onları narahat edən problemlər diqqət mərkəzində saxlanılır. Ötən müddət ərzində RİH başçısı və müavinləri şəxsən şəhid və qazilərin ailələri ilə görüşmüş, onları narahat edən məsələlər öyrənilmiş, həlli istiqamətində tədbirlərə başlanmışdır. Bütün bunlarla yanaşı, şəhid məzarlarının düzəldilməsi işləri də diqqət mərkəzində saxlanılır. 2-ci Qarabağ müharibəsi zamanı Qusar rayonu 32 şəhid vermişdir. Şəhidlərin məzar daşlarının hazırlanması məqsədilə dekabr ayının əvvəllərində işlərə başlanılmış, bütün şəhidlərin məzarlarının mərmər örtükləri və baş daşları sifariş verilmişdir. Artıq bütün məzarların betonlanma işləri başa çatdırılmış, 5 məzar mərmərlə üzlənərək baş daşları quraşdırılmışdır. 2021-ci ilin yanvar ayının 20-dək bütün şəhidlərin məzarlarının mərmər örtüklərinin və baş daşlarının quraşdırılması başa çatdırılacaqdır.

Rayon İcra Hakimiyyəti olaraq bildiririk ki, şəhid ailələrinin qayğıları daim diqqət mərkəzində saxlanılır və onları narahat edən məsələlərə bundan sonra da qayğı ilə yanaşılacaqdır. Bu hər bir vətəndaşın borcudur. Həssas mövzu olduğundan belə mövzularla bağlı informasiyalar işıqlandırılmazdan əvvəl məsələlərin ətraflı şəkildə araşdırılması daha məqsədəuyğun olardı. Qusar Rayon icra Hakimiyyəti həm bu, həm də digər sahələrdə kütləvi informasiya vasitələri ilə informasiya mübadiləsi etməyə və əməkdaşlığa hazırdır.

Rayon İcra Hakimiyyəti


Paylaş: