Əmək və Əhalinin Sosial Müdafiəsi Naziri Sahil Babayevin korrupsiya ilə mübarizə metodları hamını çaşdırıb.

Nazir təyin edildikdən sonra bir sıra dəyişikliklər edən Sahil Babayev korrupsiya ilə mübarizə aparmalı olan mühüm vəzifələrə bəzi keçmişi qaranlıq olan şəxsləri təyin edəndən sonra bu nazirlikdə heç nəyin dəyişməyəcəyi gözlənilən idi. Nazirliyin Daxili audit şöbəsi yenə də köhnə qaydalarla “xərac” yığma məşğuliyyətini davam etdirir, bu neqativ halların qarşısı alınmamışdır. Redaksiyamıza bununla bağlı bir sıra faktlar daxil olub.

Belə ki, 2018-ci ilin sentyabrından başlayaraq nazirliyin Bakı şəhəri üzrə rayon şöbələri yoxlanılmağa başlandı. İlk hədəf DSMF-in Sabunçu rayon şöbəsi olsa da, buradan “yaxşı xərac” ala bildilər. Belə ki, nazirliyin Daxili audit şöbəsinin müdiri Heybət İmanov öz əlaltıları olan Rza Əhmədov və Cəmil Kərimovu Sabunçu rayonuna yoxlamaya cəlb edərək buradan 200 000 AZN pul qopara bilib. Bu adamlar vasitəsilə sosial yardım və əmək pensiyasına dair bəzi qanunsuz təyinatlara toxunmamaq şərti ilə külli miqdarda rüşvət toplanılıb. Qeyd olunan qanunsuz təyinatları gizlətmək və əgər üstü açılarsa, yenidən araşdırma aparıb özlərini təmizə çıxartmaq məqsədilə bir çox pensiya və müavinət işlərini Cəmil Kərimov öz evində saxlayır. Məsələ hər iki tərəfi qane etdiyindən işlərin harada olması ilə maraqlanan yoxdur. Onlarla pensiya işində nöqsanlar rüşvət müqabilində həll olunub. Bu işdə DSMF-in Sabunçu rayonu üzrə şöbəsinin müdiri ilə nazirin müşavirlərindən birinin qohumluq əlaqələri də mühüm rol oynayıb.

Nazirliyin Daxili audit şöbəsinin əməkdaşı Cəmil Kərimov təkcə bir fakt üzrə 10 000 AZN rüşvət alıb və həmin epizod üzrə pensiya işini özündə saxlayıb. Qeyd edək ki, redaksiyamıza həmin pensiya işində olan saxtakarlıq faktları məlumdur, əgər aidiyyatı orqanlar araşdırma apararsa, təqdim edə bilərik.

Daha bir məqamı diqqətə çatdırmağı özümüzə borc hesab edirik. Redaksiyamıza belə bir məlumat da Heybət İmanovun “müfəttiş”i Rza Əhmədov barəsində daxil olub. DSMF-in Xəzər rayonu üzrə şöbəsinin əməkdaşı olan, “ölü canlar” üzrə mütəxəssis Rza Əhmədov öz patronu olan köhnə korrupsioner Heybət İmanova pul daşımaqla hər yerdə nazir Sahil Babayevin ətrafının işbilməz adamlardan ibarət olduğunu, naziri bu səriştəsizlərin necə “fırlatdıqlarını” şəstlə bildirir və Heybət İmanovun tezliklə nazir müavini olacağını, yenidən qarajlarda qara kassa yaradacaqlarını deyir. Heybət İmanov nazirliyin yanında qarajda alver etdiyi günlərin nostalgiyası ilə yaşayır. Hər kəsin bir keçmişi vardır, lakin Heybət İmanovun keçmişi o qədər çirkaba batmışdır ki, bu da gənc nazir Sahil Babayevin də bütün başladığı işlərdə, nəzarətinə aldığı hər bir sahədə üzünü qaraldır.

Rza Əhmədovu ünvanlı sosial yardım sahəsində Bakı şəhərindəki ən çox kartı özündə saxlayan şəxs kimi də xarakterizə etmək olar. Heybət İmanov nazirin başının islahatlara qarışdığı bir dövrdə bundan əlverişli şəkildə istifadə etməyə nail olub. O, Rza Əhmədovu rayonlara yoxlamaya göndərir ki, getsin, idarələrdə nəsə tapıb onu o qədər şişirtsin ki, işçilər qorxusundan Rzanın istədiyi məbləği ona versinlər. Rza Əhmədov da kobud davranışı ilə işçiləri zara gətirməklə neqativ hallar üzə çıxartdığı zaman onlar barəsində məlumatı Baş prokuror yanında Korrupsiyaya qarşı Mübarizə Baş İdarəsinə göndərəcəyini bildirməklə bir növ şantaj işi həyata keçirmişdir. Bununla da, Heybət İmanov Rza Əhmədovun bu “şantajçı qabiliyyəti”ni yüksək qiymətləndirir. Bundan əlavə Rza Əhmədov özü kimi şəxsləri Heybət İmanova təqdim edərək müvafiq məbləğ qarşılığında onları vəzifəyə təyin etdirməklə başqa növ cinayətə də imza atmışdır. Buna misal olaraq DSMF-in Nərimanov rayonu üzrə şöbəsinin sektor müdiri Ramal Məmmədovun təyinatını qeyd etmək olar.

Nazir Sahil Babayev hər yerdə fəxrlə saxta əlilliyə qarşı mübarizə apardıqlarını və 1300 nəfər vətəndaşın əlilliyini ləğv etdiklərini bəyan etmişdir. Lakin bildirək ki, “Əlillər klubu” sözün həqiqi mənasında nazirliyin Daxili audit şöbəsində fəaliyyət göstərir. Belə ki, Daxili audit şöbəsinin əməkdaşlarının əksəriyyəti saxta əlilliyi olan, əlillik müavinəti alan və əmək qabiliyyəti olmayan şəxslər kimi qeydiyyata düşmüş insanlardır. Məqalədə adları çəkilmiş vəzifəli şəxslər olan Heybət İmanov, Cəmil Kərimov, Rüfət Bəbirov və bir neçə digər əməkdaş saxta yolla əlillik əldə etmiş şəxslərdir. Qeyd olunan faktlar barədə dəfələrlə mətbuatda informasiyalar getsə də, nazir Sahil Babayev yəqin ki, Daxili audit şöbəsinin müdiri Heybət İmanovun yanında hansı səbəblərə görə isə gözükölgəli olduğundan heç bir sərt addım atmır, müəyyən bir münasibət bildirmir. Bundan yalnız belə qənaətə gəlmək olur ki, rayonlar üzrə fəaliyyət göstərən şöbələrdən toplanmış rüşvətləri tək yemək mümkün olmamışdır.

Redaksiyamıza Daxili audit şöbəsinin adının çəkilməsini istəməyən əməkdaşları tərəfindən təqdim olunan “Heybət İmanov, Cəmil Kərimov və Rüfət Bəbirov triosu”nun əlilliyi olan şəxslər olduğunu təsdiq edən sənədlərdə bir sıra maraqlı məqamlar əksini tapmışdır.

Faktları təqdim edirik:

1. Heybət İmanov: II qrup əlildir. Əlillik sənədinə görə əqli cəhətdən zəif, idrakın enməsi, qabarıq yaddaş pozuntuları olan, görmə qabiliyyəti zəif, psixi pozuntuları olan, adi şəraitdə işləyə bilməyən əmək qabiliyyətsiz şəxsdir. İşin gülməli tərəfi odur ki, bu adam guya alimdir, fəlsəfə elmləri doktorudur. Faciə isə ondan ibarətdir ki, belə bir şəxs idarəetmə orqanlarında səlahiyyətli vəzifə sahibi təyin olunmuşdur.

2. Cəmil Kərimov: II qrup əlildir. Gərginlik stenokardiyası, III dərəcəli kəskin ürək çatışmazlığı, hipertoniya diaqnozu olan əmək qabiliyyətsiz şəxsdir. Bu adam “müfəttiş”dir, guya nöqsanları axtarıb tapır.

3. Rüfət Bəbirov: II qrup əlildir. Hipertoniya II mərhələ, ağır ensofalopatik hal, yüksək risk faktoru ilə stenokardiya, xroniki beyin qan dövranının pozğunluğu diaqnozu ilə əmək qabiliyyəti olmayan şəxsdir.

Kənardan baxıb qiymətləndirdikdə hər üç şəxsin sağlamlıq durumunun ağır olduğu, hətta yataq xəstələri kimi diqqəti cəlb etdikləri açıq-aydın görünməkdədir.

Hörmətli nazir Sahil Babayev bu məsələyə ciddi reaksiya verməlidir, əks halda, belə hesab edilə bilər ki, gənc nazir ciddi səlahiyyətli dövlət vəzifələrini icra etmək üçün sağlam adam tapa bilməmişdir. Nəticədə, nə qədər ağır olsa da, “Bura Azərbaycandır” məsəli özünü doğrultmuş olur. Əlbəttə, heç kimə gizli deyil ki, müxtəlif sahələrdə neqativ hallar var və çox zaman da gizlədilir. Məsələn, vəzifəli şəxsin özünün saxta əlilliyi ola bilər, hamıya saxtakarlıqla mübarizə apardığının görüntüsünü yarada bilər. Lakin anlamadığımız məqam ondan ibarətdir ki, islahatlara start vermiş, yeniliklərə imza atmağa çalışan nazir Sahil Babayev susur... \\gundemxeber.az\\


Paylaş: