“Azər Türk Bank” 2020-ci ilin 4-cü rübünə olan hesabatını açıqlayıb.

regionxeberlericom.az Valyuta.az-a istinadla xəbər verir ki, bankın cəmi aktivləri 2019-cu ilin 4-cü rübü ilə müqayisədə 11 mln. 489 min manat artaraq 359 mln. 207 min manata çatıb. Bunun əsas səbəbi isə bankda bloklaşdırılmış nəğd vəsaitin 18 mln. 166 min manat artmasıdır.

Bankın mərkəzi bank və dövlət fondları qarşısında öhdəliklərinin 17 mln. 199 min manat artması dövlət bankının cəmi öhdəliklərinin artmasına səbəb olub. Belə ki, “Azər Türk Bank”ın cəmi öhdəlikləri 11 mln. 178 min manat artaraq 303 mln. 296 min manata çatıb.

Bankın cəmi kapitalı isə 311 min manat artaraq 55 mln. 911 min manata çatıb.

DEPOZİT PORTFELİ KİÇİLİB

Dövlət bankının müştərilərinə verdiyi kreditlər 19 mln. 154 min manat azalaraq 160 mln. 248 min manata enib. Bundan başqa müştərilər banka yerləşdirdiyi əmanətləri geri çəkiblər. Belə ki, bank depozit portfeli 344 min manat azalaraq 179 mln. 940 min manata enib. Bunun əsas səbəbi fiziki şəxslərin bankda olan depozitlərinin 8 mln. 657 min manat artması qarşılığında, hüquqi şəxslərin depozitlərinin 9 mln. manat azalmasıdır.

MƏNFƏƏTİ AZALIB

Bankın faiz gəliri 21 mln. 136 min manat, faiz xərci 6 mln. 378 min manat olub. Buna görə bankın xalis faiz gəliri 14 mln. 759 min manat olub. Dövlət bankının qeyri-faiz gəliri 9 mln. 891 min manat, qeyri-faiz xərcləri isə 23 mln. 816 min manat olub. Nəticədə bankın əməliyyat mənfəəti 834 min manat olub. Bu da ötən ilin eyni dövrü ilə müqayisədə 1 mln. 714 min manat azdır.

Bankın xalis mənfəəti 180 min manat azalaraq 423 min manata enib.

“Azər Türk Bank”ın məcmu kapitalı 286 min manat azalaraq 50 mln. 38 min manata enib. Yəni, dövlət bankının lisenziyasının ləğv olunmasına 38 min manat qalıb.

Xatırladaq ki, Banklar haqqında qanuna görə Azərbaycanda fəaliyyət göstərən bankların məcmu kapitalı 50 mln. manatdan az olmamalıdır.


Paylaş: