Azərbaycanda ən çox qarşılaşılan xoşagəlməz hallardan biri də bələdiyyə-vətəndaş məsələsidir.

Bugün bir çox bölgələrdə müxtəlif səbəblərlə bələdiyyələrdən narazılıqlar mütəmadi olaraq redaksiyamıza vətəndaşlar tərəfindən müraciətlər olunur.Növbəti şikayət Quba rayonu, Gədik kəndi, Vəlvələ bələdiyyəsinin sədrindəndir.

Bununla bağlı Gədik kəndinin sakini Rəsul Mehrəliyevin “Yeni Gündəm”ə daxil olan şikayətini təqdim edirik:

“Bir müddət öncə icarəyə torpaq götürmək üçün Vəlvələ bələdiyyəsinə aidiyatı üzrə müraciət etdim. Bələdiyyə sədri Tahirmirzə Məmmədov mənə o torpağı yalnız müəyyən ödəniş edəcəyim təqdirdə verəcəyimi bildirdi. Bundan sonra cənab Prezident İlham Əliyevə məktub ünvanladım.

Prezidentimizə təşəkkürümü bildirirəm, məktubumu dəyərləndirdi və mənə icarəyə torpaq verilməsi haqda müvafiq göstəriş verdi. Buna baxmayaraq, bələdiyyə sədri məndən əl çəkmir, məndən 600 manat pul istəyir, etiraz edəndə isə arxasında Quba Rayon İcra Hakimiyyətinin durduğunu bildirir. Qanunsuz olaraq torpaqları müxtəlif qiymətlərə satır, şikayət edəcəyimizi bildirəndə isə təhqir edir, “kimə istəyirsiz edin” deyir.
İcra Hakimiyyətinə müraciət edəndə isə müxtəlif formalarda sadəcə bəhanələrlə baxıldığını bildirirlər. Demək olar ki, burada yaşayanların çoxu bu problemlərlə qarşılaşır. Bilmirik dərdimizi kimə deyək.”
Qeyd edək ki, bundan öncə də müxtəlif səbəblərlə Vəlvələ bələdiyyəsinə tabe olan Gədik və digər kəndlərlə bağlı mətbuatda yazılar dərc olunub.

Məsələ ilə bağlı Quba rayon İcra Hakimiyyətinin birinci müavini Tariyel İbrahimov “Yeni Gündəm”ə bildirib ki,
Vətəndaşa ötən ilin 8 dekabr tarixində kənd təsərrüfatı istifadəsi məqsədilə 1 hektar torpaq verilib. Rüşvət kimi pul istənməsi cəfəngiyyatdır, sadəcə müvafiq rüsumlarla bağlı ödəniş istənilib.

Vəlvələ bələdiyyəsinin sədri Tahirmirzə Məmmədov “Yeni Gündəm”ə açıqlamasında bildirib ki, 2020-ci il dekabr ayında Rəsul Mehrəliyevə müraciətinə əsasən torpaq verildi. Bundan öncə də müxtəlif qurumlara şikayət edib.
Ondan rüşvətə pul istəmək tamamilə əsassızdır. 1hektar torpaq əvəzində aylıq icarə haqqı 20 manat verməli olsa da, bugünə kimi onu da verməyib. Ümumiyyətlə məndən öncə çalışanlara da müxtəlif formalarda qarayaxma, şər, böhtan formalı şikayətlər edib.

Yenigundem.az


Paylaş: