Şeyxülislam Hacı Allahşükür Paşazadə dindarların 29 iyul 2003-cü il tarixdə Bakı şəhərində keçirilmiş XI qurultayında yekdilliklə Qafqaz Müsəlmanları İdarəsinin ömürlük sədri - Şeyxülislam seçilib.

Uzun zamandır ki, sosial şəbəkələrdə Hacı Allahşükür Paşazadədən sonra Qafqaz Müsəlmənları İdarəsinə kimin rəhbər seçiləcəyi müzakirə olunur. Müxtəlif fərziyyələr ortaya atılsa da, konkret fikir yoxdur.

Dini ekspert Kənan Rövşənoğlu Modern.az-a bildirir ki, Qafqaz Müsəlmanları İdarəsi Azərbaycanda müsəlman dini qurumlarının ümumi rəhbərliyi və ya başqa sözlə koordinasiyasını həyata keçirən qeyri-dövlət qurumudur:

“İlk olaraq 1832-ci ildə yaradılıb. 1872-ci ildən etibarən isə hazırkı strukturuna yaxın təşkilatlanmış quruma çevrilib. Sovet dövründə ləğv olunsa da, 1944-cü ildə yenidən fəaliyyətini bərpa edib.

Hazırda QMİ də qeyri-dövlət dini icmaları kimi Dini Qurumlarla İş üzrə Dövlət Komitəsi tərəfindən dövlət qeydiyyatına alınıb.

Lakin dövlət tərəfindən bir mənada müsəlman icmalarının dini fəaliyyətinə rəhbərlik edir. İdarəyə Şeyxülislam sədrlik edir. Onun birinci müavini isə Müftidir.

Hazırkı Şeyxülislam Hacı Allahşükür Paşazadə 1980-ci ildən bu postdadır. 2003-cü ilə qədər qurultayda Şeyxülislam vəzifəsinə seçkilər keçirilsə də, həmin il keçirilən qurultayda hazırkı Şeyxülislam ömürlük sədr seçilib.

QMİ-nin ali orqanı qurultaydır. Sonuncu qurultay 2009-cü ildə keçirilib. Ancaq sədr ömürlük seçildiyi üçün sonuncu qurultayda sədr seçkisi məsələsi gündəmə gəlməyib.

QMİ-nin sədri ümumi olaraq təşkilata rəhbərlik edir. Bundan başqa qurumun Elmi-Dini Şurası və Qazılar Şurası fəaliyyət göstərir. Hər bölgə üzrə qazılar var ki, onlar da həmin ərazidə QMİ-nin nümayəndəsi hesab olunur. Bundan başqa səlahiyyətli nümayəndələr də var. Onlar da QMİ sədrinin təmsilçiləridir. Dediyim kimi, sədr seçkiləri hazırda gündəmdə deyil, çünki hazırkı 12-ci Şeyxülislam Allahşükür Paşazadə bu posta ömürlük seçilib. Təşkilatın Nizamnaməsinə əsasən yeni sədri də qurultay seçir”.


Paylaş: