2010-cu ildən bu yana Azərbaycan Respublikası Prezidenti İlham Əliyev mətbuat işçilərinin sosial müdafiəsinin gücləndirilməsi ilə əlaqədar üç sərəncam imzalayıb. Və bu sərəncamlara uyğun olaraq Bakının Bibiheybət qəsəbəsində yaşayış binaları inşa edilib. Onlardan ikisinin açılışı 2013 və 2017-ci illərdə ölkə başçısının iştirakı ilə keçib. Üçüncü yaşayış binası isə hələlik istifadəyə verilməyib. Hazırda iki binada sakinlər yaşayır. Və bizim söhbətimiz də məhz onlar haqqında, daha doğrusu bu binalardakı mənzillərinin özəlləşdirilməsi zamanı meydana çıxmış anlaşılmazlıqla bağlıdır.

Məsələ burasındadır ki, Prezidentinin cərəncamı əsasında tam dövlət vəsaitinə tikilmiş və neçə ildir hər yerdə, hər məqamda ölkə rəhbərinin jurnalistlərə birdəfəlik və əvəzsiz hədiyyəsi olduğu qeyd edilən mənzilləri sakinlər özəlləşdirərkən qəribə vəziyyətlə üzləşiblər. Vaxtilə KİVDF-nin kommunal xidmət göstərmək, əslindəsə bir sıra özəl – kommersiya, inzibati rıçaq vasitəsi və sair məqsədlə təsis etdiyi “Jurnalist evi” MMC, binada yaşayış başlayanadək heç kimin mülkiyyətində olmayan mənzilləri sakinlər özəlləşdirmək istədikdə, Daşınmaz Əmlakın Dövlət Reyestri Xidmətindən (DƏDRX) əldə etdiyi sənədlə həmin adamların mənzillərindən ibarət sahəyə hissə-hissə müvəqqəti sahiblənib (?). Daha sonra daşınmaz əmlakın bağışlanması müqaviləsi əsasında mənzilləri sakinlərə notarial qaydada guya bağışlayıb. 2014-cü ildən bəri iki binadan təqribən 360 mənzil bu prosedur həyata keçirildikdən sonra özəlləşdirilib. Müqavilədə “Jurnalist evi” MMC-nin rəhbəri “hədiyyə verən”, sakinin adı isə “hədiyyə alan” kimi göstərilib. Formal yanaşsaq belə çıxır ki, mənzilləri jurnalistlərə Prezident yox, adı çəkilən MMC-nin keçmiş direktoru Bünyamin İsmayılov bağışlayıb. Və bu zaman hər mənzil sahibi nə az, nə çox 287,5 manat haqq ödəyib. Notariat hərəkətlərini paytaxtdakı 53 saylı notariat kontoru (?) icra edib. Yalnız deyilən mərhələni keçəndən sonra jurnalist sakinlər DƏDRX-yə üz tuta biliblər. Və həmin məqamda çıxarış alıb onlara məxsus mənzillərin mülkiyyətçisinə çevrilmək üçün təqribən 150-160 manat dövlət rüsumu, xidmət haqqı ödəyiblər. Beləliklə, çıxarış (“kupça”) hər bir mülkiyyətçiyə 440-450 manata, hətta, bəziləri üçün bir qədər də artıq vəsaitə başa gəlib. Ölkə başçısının hədiyyəsini sanki öz hədiyyəsi kimi sakinə bağışlayan və onun cibinə girən “cəsarətlilər” zərrəcə həya gözləməyiblər. İndiyədək digər kateqoriyadan olan şəxslər (hərbçilər, neftçilər, şəhid ailələri, müharibə veteranları, əlillər və sair) üçün dövlət vəsaitinə tikilmiş binalarda mənzil sahiblərinə orderlə verildiyi və sonrakı mərhələdə bağışlanma müqaviləsiz, yalnız çıxarışa görə dövlət rüsumu, xidmət haqqı ödənilərək özəlləşdirmə prosesi mümkün olduğu halda, nə məqsədlə jurnalistlərlə bağlı belə mövqe tutulub? Hansı hüquq və mənəvi haqla “Jurnalist evi” belə addım atıb? Prezidentin görkəmli sənət adamlarına bağışladığı mənzillər müxtəlif mənzil-tikinti kooperativlərinin şəhərin ayrı-ayrı yerlərində inşa etdiyi binalardan ayrılıb. Və onlar da mənzilləri Bakı şəhər İcra Hakimiyyətindən verilmiş order əsasında alıb, daha sonra adi qaydada özəlləşdirmək imkanına malikdir. Ancaq nədənsə artıq tarixə dönmüş KİVDF inşasını həyata keçirdiyi binalarda yaşayacaq jurnalistləri, yaratdıqları dövlət komissiyası ilə səf-nəzər etdikdən və yekunda adları qurumun müşahidə şurasının qərarına əsasən protokollaşdırdıqdan sonra, necə deyərlər, əkəndə yox, biçəndə yox, yeyəndə ortaq qardaş obrazında görünən “Jurnalist evi” MMC-ni işə qoşublar. Niyə order variantı seçilməyib? Yaxud niyə məlum protokolun surəti DƏDRX-yə göndərilməyib ki, sakinlər həmin quruma üz tutaraq mənzillərini rahatca özəlləşdirə bilsinlər? Baş verənlərin qeyri-qanuni və məntiqsiz olduğunu tanınmış neçə təcrübəli hüquqşünas təsdiqləyib.

Hər iki binadan mənzilini indiyədək özəlləşdirməmiş təqribən 50 jurnalist sakindən 30 nəfərinin imzasıyla 2021-ci il mart ayının 5-də Prezident İlham Əliyevə müraciət etdik. Mənzillərimizin özəlləşdirilməsi zamanı tətbiq edilən daşınmaz əmlakın bağışlanması müqaviləsinin qanunazidd, məntiqsiz və üstəlik ölkə başçısının nəcib işinə xələl gətirən, urvatdan salan əməl olduğunu diqqətə çatdırdıq. Prezident Adminstrasiyasının rəhbəri Samir Nuriyevin dərkənarıyla martın 11-dən Prezidentin köməkçiləri Hikmət Hacıyev və Şahmar Mövsümovun icraatına yönləndirilən məktubumuzun aqibətini öyrənmək üçün əlaqələndirici şəxs kimi dəfələrlə zəng etdim. Və hər dəfə Azərbaycan Respublikası Medianın İnkişafı Agentliyinin (MEDİA) icraçı direktoru Əhməd İsmayılova problemin həlli istiqamətində çalışmağın tapşırıldığını söylədilər. Ə. İsmayılovla əlaqə saxladıqda “məktubunuz agentliyin icraatında deyildir və sizə (?) qanunvericiliyin tələblərini izah etmişik” cavabını verdi. Xeyli vaxt ötdükdən sonra – mayın 3-də təkrarən Əhməd İsmayılovun mövqeyini öyrənmək istədikdə MEDİA əməkdaşı “sözünüzü rəhbərliyə çatdırarıq və cavabı bildirərik” dedi. Aradan xeyli vaxt keçib, ancaq hörmətli Ə. İsmayılovdan səs-səmir çıxmır. Hərçənd aprel ayında Prezident Adminstrasiyası ilə növbəti dəfə əlaqə saxlayarkən qurumun əməkdaşı MEDİA-nın icraçı direktoruna Əmlak Məsələləri Dövlət Xidmətinin rəhbərliyilə məlum problemi çözmək tapşırığının verildiyini xatırlatmışdı. Di gəl, məntiqlə jurnalistlərə digər məmurlardan bir köynək yaxın Ə. İsmayılov yaxasını kənara çəkib. MEDİA KİVDF-nin hüquqi varisidir və sələfindən miras qalan problemi həll etmək ən azı agentliyə və onun rəhbərinə hörmət gətirər. Prezidentə müraciət edən jurnalistlərin əsas məqsədi də baş vermiş haqsızlığı aradan qaldırmaq, hər şeyi ədalət, insaf və məntiqlə yoluna qoymaqdır. Təqribən əlli jurnalistlə yanaşı, istifadəyə veriləcək üçüncü binada mənzillə mükafatlandırılacaq 255 həmkarımızın aqibətini də nəzərə alsaq, məsələnin nə qədər ciddi olduğunu şərh etməyə ehtiyac qalmaz. Vaxtilə kimlərinsə səhv müəyyən etdiyi variantın ləğvi bundan sonra üst-üstə üç yüzdən artıq mənzilin lüzumsuz bağışlanma müqaviləsiz, əlavə xərcə düşmədən özəlləşdirilməsinə imkan yaradacaq. Beləliklə, haqq-ədalət yerini tapacaq, Prezidentin hədiyyəsi adına layiq şəkildə ünvanına çatmış sayılacaq. Göründüyü kimi, məsələ daha çox mənəvi əhəmiyyət kəsb edir.

Sonda on həftədən bəri qaldırılan problemin həllini gözləyən həmkarlarımın - qonşularımın adından demək istəyirəm ki, şifahi sözü sənədə tikmirlər. Yəni rəsmi müraciətə rəsmi də cavab verilməlidir. Ən azı ölkədə qüvvədə olan qanunveriçilikdə belə nəzərdə tutulub. Boş-bekar deyilik ki, ərinməz-ərinməz ölkə başçısına məktub yazırıq. Prezident jurnalistlərə nöqsanları dilə gətirməyi, tənqidi fikirdən çəkinməməyi dəfələrlə tövsiyyə edib. Deyirik, buyurun, tədbir görün. Və bu məqamı necə deyərlər, işinin adı jurnalistlərlə çalışmaq olan, ötən ildən bəri neçə yazılı müraciətimizi cavabsız qoymuş, bizi saya salmayan, ixtisasca hüquqşünas Ə. İsmayılovun unutmaması yerinə düşər.

İnşallah tezliklə mənzilini mahiyyətinə uyğun şəkildə özəlləşdirəcəyinə inanan Seymur Elsevər //pravda.az//



Paylaş: