"Vikipediya -internetdə sərbəst yayımlanan, könüllü istifadəçilərin viki texnologiyaları (“sürətli düzəliş”, “canlı sənədlər texnologiyaları”) yolu ilə bilgilərini paylaşdığı onlayn ensiklopediyadır. “Viki” sözünün ingilis dilindəki “what i now is” (“mən nə bilirəm”) ifadəsinin birinci hərflərindən əmələ gəldiyi güman edilir. 2009-cu ilin araşdırması ingilis dilində olan vikipediyanı ən çox oxunan internet saytları arasında 1-ci yerə çıxarıb". Bu barədə DİA.AZ-a göndərilən məqalədə deyilir.

Məqalədə daha sonra bildirilir: "Qeyri-hökumət təşkilatı olan Vikimedia Fondunun yaratdığı virtual ensiklopediyanın başlıca ayrıntısı açıq olması , yəni istənilən istifadəçinin onu redaktə edə bilməsidir. Amma bu açıqlıq şişirtməyə, neytrallığı pozmağa haqq vermir. Kimin haqlı olmasını “vikipediya məhkəməsi” bəlirləyir. Yeri gəlmişkən, Dağlıq Qarabağ ilə bağlı “viki savaş”da azərbaycanlı Təbib Hüseynovun erməni rəqiblərini yenməsi “viki məhkəmə” qərarı ilə doğrulanıb. Amma içimizdəki düşmən (başqa söz tapa bilmirik) Qarabağ davasını üz-üzə savaş meydanından yayındırmaqla, ərazi bütövlüyümüzə təxribat törədir.

Azərbaycan dilindəki vikipediyanın “Ermənistan dramı” məqaləsində , görün, nə yazılıb? “ERMƏNİSTANIN VƏ DAĞLIQ QARABAĞ RESPUBLİKASININ MİLLİ PUL VAHİDİDİR”. Dəhşətli təxribata baxın, “öz” vikipediyamız dünyaya paylaşır ki, dram “gorbagor respublika”nın “milli pul vahididir”! (?) Bizə düşmən gərəkir? Biz bunu redaktə edib “Dağlıq Qarabağ Respublikası” ifadəsini sildik. Ancaq kim zəmanət verə bilər ki, yenidən içimizdəki düşmən (lər) redaktə aparıb, qondarmalığı bərpa etməyəcək? Hələ biz ingilis dilində olan vikipediya məqaləsinin dilimizə çevrilərək “dramın Ermənistanın və qonşu Artsax (?-M.B.) Respublikasının pul vahidi” olması haqqında təxribatını demirik! Rus , ingilis vikipediya haqsızlıqlarını bir qırağa qoymağa da haqqımız yoxdur, amma axı, özümüz öz dilimizdə özümüzə “gorbagor” quyusu qazırıq” ? Düşünmək olar ki, bu təxribatı azərbaycandilli ermənilər edir, lakin bu düşüncə bizə başucalığı gətirmir . Hakerlərimiz Ermənistanın hökumət portalını azərbaycan dilində “danışmağa” məcbur edirsə, öz dilimizdəki sayt niyə açıq erməni təxribatı yaratmalıdır? Düşünürük ki, bizim diqqətsizliyimizdən yararlanılır.

Fikrimizcə, sayıqlığı bir an belə itirmək olmaz və sözügedən təxribatı törədənləri müvafiq dövlət qurumları bəlirləyib, haqqımıza girənlərin dərsini verməyə borcludur".




Paylaş: