Məlum olduğu kimi, hazırda Ermənistanın baş naziri vəzifəsini icra edən Nikol Paşinyan 12 il əvvəl - 1 iyul 2009-cu il tarixində prezident seçkiləri zamanı kütləvi iğtişaşlar törətməkdə təqsirli bilinərək həbs olunub.
Yeniavaz.com xəbər verir ki, Nikol Paşinyanın həbsdə olduğu zaman qələmə aldığı xatirələri 2 il əvvəl "Dünyanın digər üzü" ("Երկրի հակառակ կողմը") adlı kitabında yer alıb.
Kitabda yer alan maraqlı məqamlardan biri Paşinyanın həbs olunmazdan əvvəl gizli şəkildə Ermənistana geri qayıtmasına yardım edən azərbaycanlı ilə bağlıdır.
Bildiyimiz kimi, 2008-ci ilin mart ayında Ermənistanda keçirilən prezident seçkilərinin nəticələri müxalifət tərəfindən tanınmadıqdan sonra başlayan kütləvi etirazlar o zamankı dövlət başçısı Serj Sarkisyan tərəfindən silah gücünə yatırılıb. Həmin dövrdə Ermənistanda onlarla insan öldürülüb, yüzlərlə insan həbs olunub, bir çox insan isə həbs olunmamaq üçün ölkədən qaçmaq məcburiyyətində qalıb. Ölkədən qaçan insanlardan biri də seçkilərdə Ermənistan prezidentliyinə namizəd Levon Ter-Petrosyanın seçki qərargahının üzvü və 1 mart tarixində baş tutan etiraz aksiyasının əsas təşkilatçılarından olan Nikol Paşinyan olub.
Nikol Paşinyan Ermənistandan qaçdıqdan sonra qonşu Gürcüstanda gizlənib və təxminən bir ildən sonra gizli şəkildə Ermənistana geri dönmək qərarına gəlib. Paşinyan kitabında (səh. 359) onu Gürcüstan-Ermənistan sərhədindən 2 nəfərin keçirdiyini və onlardan birinin erməni (adı Sako), digərinin isə azərbaycanlı (adı Vəzir) olduğunu yazıb.
Paşinyan kitabında qeyd edib ki, Vəzir onunla erməni dilində, ancaq Azərbaycan ləhcəsilə danışıb. Sako və Vəzir Paşinyanı Gürcüstan-Ermənistan sərhədindən axan Pəmbək çayından (gürcü dilində Debed çayı) keçiriblər. Paşinyan kitabında yazır ki, çayı Sako ilə birgə keçib. Vəzir isə sahildə onların bağlı olduğu ipi saxlayıb. Paşinyan daha sonra qeyd edir ki, o, Vəzirin saxladığı ipi tutaraq çayı keçib və Ermənistan tərəfinə keçəndən sonra yadına düşüb ki, Vəzirə təşəkkür etməyi unudub (səh. 362).


Paylaş: