İyulun 10-da Saatlı rayonun bir neçə yaşayış məntəqəsinin sakinlərinin, içməli və suvarma suyu təminatın zəif olmasına görə, etiraz aksiyası keçirdiyi deyilir. Bu barədə AzadlıqRadiosuna Saatlı rayonun Xanlarkənd kəndində yaşayan sakinlər məlumat verib.

“Əhalinin min bir əziyyətlə yetişdirdiyi pambıq, yonca yanır ”

Həmin kəndin sakinlərindən birinin sözlərinə görə, bu il Saatlıda su problemi daha da ciddiləşib:

“Mart ayından bəri hələ düz-əməlli su üzü görməmişik. Əhalinin min bir əziyyətlə yetişdirdiyi pambıq, yonca, bostan əkinləri yanır. Kanalların dibində qalan su lilləndiyindən ondan istifadə də təhlükəlidir. Bəzi yerlərdə adamlar məcbur olub şor kolektorların suyu ilə əkinlərini suvarır. Özümüz də, heyvanlarımız da içmək üçün təmiz su tapa bilmirik.”

“İki yerdə kütləvi toplana və etirazımızı ifadə edə bildik”

O, deyir ki, dəfələrlə Saatlı Rayon İcra Hakimiyyətində qəbulda olub, problemlərini icra başçısına söyləyiblər. O, vurğulayır ki, təsirli tədbirlər görülmədiyindən aksiyaya əl atıblar:

“Hər dəfə bizə problemin iqlimlə əlaqəli, ölkə miqyasında oldugunu söyləyiblər, yalançı vədlər verilib. On gün bundan qabaq xəbərdarlıq etdik ki, kütləvi aksiyalar keçirmək məcburiyyətində qalacağıq. Dünəndən qonşu kəndlərdə yaşayanlarla sözü bir yerə qoyduq ki, Xanlarkənddən dinc yürüşə başlayıb, sonda Hacıqabul-Horadiz avtomobil yolunu bağlayaq. Polis nəzərdə tutulan yerdə aksiyanın baş tutmasının qarşısını alsa da, iki yerdə kütləvi toplana və etirazımızı ifadə edə bildik.”

“İcra başçısı və hüquq-mühafizə orqanlarının rəhbərləri əhali ilə görüşə gəlib”

Başqa bir kənd sakini isə əlavə edib ki, məhz bu aksiyaya görə, rayonun icra başçısı və hüquq-mühafizə orqanlarının rəhbərləri əhali ilə görüşə gəlib:

“Üzləşdiyimiz çətinliyi bir daha rəsmilərin nəzərinə çatdırdıq. Xatırlatdıq ki, prezident yanında keçirilən müşavirələrin birində rayonun sabiq icra başçısı da Saatlıda su probleminin ciddiliyini dövlət başçısının diqqətinə çatdırmışdı, Kür çayından 17 kilometr uzunluqda yeni kanalın çəkilməsi ilə bağlı təklif vermişdi. Bizə deyirlər ki, bu layihə hazırdır, amma onun icrası mərkəzi orqanlardan asılıdır. Belə çıxır ki, bunların bizə su vermək niyyəti yoxdur.”

Bu deyilənlərə Saatlı Rayon İcra Hakimiyyətindən və Rayon Suvarma Sistemləri İdarəsindən mövqe öyrənə bilmədik. Davamlı zənglərimizə rəsmilərdən heç kəs cavab vermədi.

Amma “Turan” Agentliyinin xəbərinə görə, yerli polisdən onlara aksiyanin olmasi haqqında deyilənləri təsiqləməyiblər, rayonda sakitlik olduğunu söyləyiblər.


Paylaş: