Suraxanı rayonu, Hövsan qəsəbəsində Mənzil İnşaatı Dövlət Agentliyinin (MİDA) Zığ şossesi-Hava Limanı 12-ci kilometrliyində inşa etdiyi Hövsan yaşayış kompleksinin qarovulçusu, 1992-ci il təvəllüdlü Rüstəm Adil oğlu Bayramov 10 oktyabr 2020-ci ildə qətlə yetirilib.

Rüstəm Bayramovun atası Adil Bayramov oğlunun qətlinin üstünün açılmamasına etiraz edir. O, baş prokuror Kamran Əliyevə müraciət edərək cinayət işinin Suraxanı Rayon Prokurorluğundan alınaraq Ağır Cinayətlərin İstintaqı İdarəsində araşdırılmasını istəyir:

“10 aydır ki, Suraxanı Rayon Prokurorluğunda başlanmış cinayət işi yerində sayır. Cinayətin üstünü açmağa həvəsli görünmürlər. Oğlumun meyiti qarovulçu olduğu sosial binaların yaxınlığında, yoldan 15 metr aralıda aşkar olunub. Bu haqda mənə polis məlumat verdi. Həmin zaman pandemiya ilə bağlı karantin günləri idi, gecələr küçəyə kimsənin çıxmasına icazə verilmirdi. Mən oktyabrın 9-da axşam 5-də oğlumu aparıb iş yerinə çatdırmışam. Axşam 10-na işləmiş Rüstəm mənə zəng edib, telefonla danışmışıq. Səhər 7-də də mən ona işə yemək aparmalı idim. Rüstəm günortalar orada fəhlə, axşamlar isə qarovulçu işləyirdi ki, ailəni dolandırsın. Mən evdən çıxandan Rüstəmə zəng elədim, cavab vermədi. Yolda telefonuma zəng gəldi. Danışan polis idi, dedi ki, gəl 30-cu polis bölməsinə. Bölməyə getdim, növbətçi hissədən dedilər ki, gözlə. Su, yemək verdim, dedilər ki, götürmürük. 11-in yarısı oldu, mənə dedilər ki, oğlunu öldürüblər”.

Adil Bayramov deyir ki, “Araz-İnşaatçı” MMC-nin işçisi olub, 1 il 7 ay ərzində sosial binaların tikintisində fəhlə kimi çalışıb: “2019-cu ilin dekabrında tanışım Taleh Hüseynov məni aldadaraq maşınımı öz adına keçirdi, banka girov qoyub pul aldı. Bunu biləndən sonra aramızda söz-söhbət oldu, Rüstəm də buna görə onunla mübahisə etdi. Sözləşdilər, bir-birinin yaxasından tutdular. 2020-ci il martın 21-nə qədər mübahisə, söz-söhbət davam etdi. Taleh maşına görə hər gün 10 manat ödəməli olsa da, ödəmirdi. Mübahisə də buna görə davam edirdi. Taleh Hüseynov Novruz bayramında oğlum Rüstəmi Hövsana çağırdı. Mən də getdim. Çünki bundan əvvəl deyirdi ki, Rüstəmi öldürəcəyəm. Ona görə də mən də oğlumla bərabər getdim. Gördüm ki, Taleh Hüseynov yanında iki idmançı görkəmli şəxslə gəlib. Hövsan Bələdiyyə binasının yanında onlar oğluma hücum etdilər. Talehin əlində bıçaq vardı, oğlumu vurmaq istəyirdi. Həmin vaxt ora 541 çağırış nişanlı Post-Patrul Xidmətinin avtomobili gəldi. Taleh Hüseynov polisi görəndə bıçağı yerə atmışdı. Salman adlı polis onları saxladı, bizi bölməyə apardılar. Polisdə ona dedilər ki, get, maşını girovdan çıxar. Sənə yaxşılıq ediblər, sən əvəzində pislik eləmə. Bundan sonra Taleh Hüseynov itdi. Mən maşınla taksi fəaliyyəti ilə məşğulam, maşın olmasa, dolana bilmərik. Rüstəm də maşınım əlimdən çıxmasın deyə fəhlə işlədiyi binada qarovulçu işinə də keçdi. Gecə-gündüz işləyirdi ki, birtəhər dolanaq. Oğlum evə gəlmirdi ki, pul qazansın, maşının pulunu verək. Talehin qardaşı da deyirdi ki, o, harasa gedib, ölkədə deyil. Mənim oğlumu təhdid edən, öldürmək istəyən Taleh olub”.

Adil Bayramovun sözlərinə görə, hadisə baş verəndən sonra onu Suraxanı Rayon Prokurorluğuna dəvət ediblər: “Orada müstəntiqin yanında Rüstəmin işlədiyi yerdə videolara baxdıq. Görünürdü ki, binada onunla bərabər çalışan Kərim adlı digər qarovulçu ilə bir-birilərini itələyirlər. Kərim də deyir ki, həmin gün axşam Rüstəmi evə yola salıb. Mən də deyirəm ki, Rüstəm karantinlə əlaqəli qapanma olduğuna görə evə piyada gələ bilməzdi. Ona maşın lazım olacaqdı. Cavab vermir, deyir ki, get, sənin oğlunun meyitini tapdığını deyən qadınlardan yapış. Həmin qadını da çağırıb dindiriblər. O da deyir ki, gecə idi, küçəyə çıxdım, yanımda gəlinim vardı, itlər bizi parçalamasın deyə əlimizə daş götürmüşdük. Getdiyimiz yerdə bir nəfərin zarıdığını gördük. Gedib oğlumu çağırdıq, o da gəlib telefonla işıq saldı, gördük bir cavan oğlandır. Bu adamlar da polisə xəbər verməyiblər. Oğlumu kim tapıb, hadisə necə olub, bizə demirlər. Bildiyim odur ki, oğlumun başını daşla əziblər. Bunu kim edib sualına da 10 aydır ki, istintaq cavab verə bilmir”.

Adil Bayramov baş prokuror Kamran Əliyevdən xahiş edir ki, cinayət işinin istintaqını nəzarətə götürməklə tez bir zamanda açılmasını təmin etsin.
“Yeni Müsavat”


Paylaş: