"Düz bir il əvvəl, 2020-ci il iyul ayında mənim üçün əziz olan "Xəzər TV"dən ayrılmaq istəmişdim, amma həmin ərəfədə baş verən hadisələr məni dayandırdı".

Bu barədə tanınmış aparıcı Xoşqədəm Baxşəliyeva "Instagram" hesabında yazıb. O bildirib ki, noyabr ayında çox böyük haqsızlıqla üz-üzə qalıb:

"O vaxt belə kanaldan ayrılmağı qeyri-etik saydım. Çünki kanalı sezonun ortasında pis vəziyyətdə qoymaq heç bir peşəkarlığa sığmazdı. Məhz buna görə mən sezon bitənə qədər gözlədim. 23 iyul veriliş bitdi və növbəti həftə artıq rəhbərliyə kanaldan ayrılmaq istədiyimi bildirdim. Bütün dünyada olduğu kimi, mən də sezon bitəndə çalışmaq istəmədiyimi açıqladım. Təbii ki, rəhbərlik buna razılıq vermədi, mənə düşünmək üçün vaxt verdi, istəklərimin hamısını nəzərə alacağını bildirdi. Amma, özüm öz istəyimlə bu qərarı verdim. Təbii ki, bir kanal üçün 3 saatlıq efir vaxtını dolduran, TV-yə böyük pullar gətirən, reytinq gətirən bir layihəni itirmək asan deyil.

Bütün dünyada bu cür ayrılmalar var, TV-lər transferlər edir, elə ən çox baxdığımız türk kanallarına diqqət edin. Hər kəsə bəllidir ki, "Səni axtarıram" mənə aid, rəhbəri olduğum bir layihədir. Yəni, hansısa bir TV-nin layihəsi deyil ki, bu layihənin müəllifi çalışdığı kanalla yolların ayıranda layihə bağlandı və s. yazaq. Elə çox da uzağa getməyək. Murad müəllimin özünün müəllifi olduğu “Maşın Şou” "Lider TV"də başladı, "ATV" kanalına getdi, daha sonra "ANS"də, sonra təkrar "ATV"də davam etdi. Burada nə var?

Bu fotonu bilərək paylaşıram ki, biləsiniz, körpələrimlə birlikdə böyüməsi üçün böyük fədakarlıq göstərdiyim, əmək sərf etdiyim kanaldan ayrılmaq heç də asan deyil. Onlar yeni doğulmuşdu, mən Arını xəstəxanada qoyub, Tümenə yeni sezon üçün çəkilişə getdim. 4 ayları var idi, artıq mən onları yalnız gecə işdən gələndə görürdüm. İşə başladığım kanalın o vaxtkı durumunu hər kəs çox yaxşı bilir. Düşünün, bu layihəni tamaşaçımın olmadığı bir TV-də baxımlı etməklə yanaşı bir TV-nin reytinqini qaldırmaq, sponsorlar cəlb etmək üçün nə qədər əmək sərf etmişəm.

Əmək verdiyim bir kanaldan ayrılmaq sizcə asandırmı? Təbii ki, yox! Amma elə şeylər olur ki, insan heç nəyə baxmır. Mən kimsəni qırmadan öz ərizəmlə ayrıldım (ərizəni paylaşa bilərəm, amma etik deyil) "Xəzər TV" mənim öz doğma kanalımdır, o cümlədən Murad müəllim mənim üçün çox doğmadır. Elə olmasaydı, ən şad günümü ona etibar etməzdim. Biz hər ikimiz zəhmətimizlə bir yerlərə gəlmiş insanlarıq və rəhbərim olduğu müddətdə münasibətlərimiz qarşılıqlı hörmət və dostluq üzərində olub. Noyabr ayında haqsızlıqla qarşılaşanda mənə dəstək verən doğmalarımdan biri Murad müəllim olub. Deməyim odur ki, Murad Dadaşov bir qadınla savaşacaq kişiliyə sahib biri deyil ki, mən ona görə kanaldan gedim. Mənim ayrılmamın rəhbərliyimə, dostluq etdiyim bir insanla münasibətlərimə heç bir aidiyyəti yoxdur! Ayrılmaq düşmən olmaq demək deyil. Axı niyə biz istər işdə, istər ailədən ayrılarkən düşmənçilik kimi anlayırıq, o tərəfə çəkirik? Türkiyə televiziyalarında da bu hallar yaşanır və çox da normal qarşılanır. Bu il Seda Sayan da dostu Acunun kanalından ayrılıb, digər kanala keçdi. İndi düşmən olsunlar? Niyə başqa ölkələrdə bu cür ayrılmalar normal qarşılanır, amma biz nəsə axtarırıq?!

Nə isə, çox vaxtınızı almayım, rahat olun mən özüm ayrılmışam və hazırda istirahət edirəm. Hə, yeri gəlmişkən, “Səni Axtarıram”ın sezon finalında dediyim kimi, harada olmağımdan asılı olmayaraq, hər zaman sizinləyəm. Axtarışlarınızı, sosial problemlərinizi “Səni Axtarıram”ın "Instagram" hesabına, "WhatsApp" nömrələrimizə (050) 501 01 47, (070) 277 18 25 yazın, yardımçı olaq və “Xoşqədəm Hidayətqızı Official” "Youtube" kanalımızı da izləməyi unutmayın!".

Aparıcı son olaraq bu sözləri də qeyd edib:

"Və mənim sevdiyim kanaldan ayrılmağımla bağlı xəbər hazırlayıb məni hər dəfə bir kanala aparan, ordan qovduran, sonra kiminləsə calaşdırıb sonra yenə qovduran dostlar, lütfən bu açıqlamadan sonra məni haralarasa aparmağı dayandırın, söz verirəm qərarımı verdiyim gün açıqlamanı özüm sizə verəcəm. İstirahətdəyəm , icazənizlə istirahət edim, çünki bu istirahət mənim haqqımdır.

Sizi çox sevirəm".


Paylaş: