Son zamanlar ərzaq məhsullarının qiymətində bahalaşma müşahidə olunur. Məlumdur ki, pandemiya ilə əlaqədar olaraq xarici ölkələrdən ərzaq idxalı məhdudlaşdırılıb. Çox güman ki, qiymət artımının tutarlı səbəblərindən biri budur. Lakin mövcud durum əhali arasında narahatlıq yaradıb.

İqtisadçı-alim Nazim Bəydəmirli bahalaşmaya səbəb olan amilləri “Sherg.az”a sadalayıb. Onun sözlərinə görə, bazar iqtisadiyyatı şəraitində qiymətlər tələb və təklif üzərində qurulur:

“Pandemiya dövründə müəyyən məhsulların xaricdən gəlişində məhdudiyyətlər var. Daxili istehsalımızla özümüzü tam təmin edə bilmirik. Beləliklə, tələb artdığı üçün qiymət bahalaşır və yerli məhsullarla xaricdən gələn məhsulları əvəz etmək vaxt aldığından qiymətlər qalxır”.

N.Bəydəmirli qeyd edib ki, pandemiya dövründə müəyyən məhsulların xaricdən gəlişində məhdudiyyətlər var:

“Süni qiymət artımı Gömrük Komitəsi tərəfindən əsassız olaraq gömrük bəyannamələrində artırılır. Beləliklə, sahibkarlara müəyyən məhdudiyyət yaradılır. Nəticədə qiymət artımı baş verir. Azərbaycanda ən böyük problemlərdən biri də məmur sahibkarlığıdır. Hansı ki, bazarı inhisarda saxlayır, rəqabət mühitini pozur. Bu zaman da qiymətlər normallaşa bilməz. Baxmayaraq ki, yay mövsümüdür, meyvə-tərəvəzlərin bol olduğu zamanda belə qiymətlər bahadır. Qiymətlərin aşağı salınması barədə isə ümumiyyətlə düşünülmür. Pandemiyanın kəskin bir zamanında normal qidalanma mümkün deyilsə, vətəndaşların xəstəliklərə qarşı müqaviməti də az olacaq”.



Paylaş: