“Nəvəm Gövhər də anası kimi akrtisa olmaq istəyir, amma biz razı deyilik”.

Bunu Yenisabah.az-a mərhum aktrisa Xanım Qafarovanın anası Gövhər Qafarova deyib.

Aktrisanın qızı ilə bir evdə yaşayan Gövhər xanım Mədəniyyət Nazirliyinin onlarla maraqlanmadığını bildirib:

“Nənə-nəvə oturmuşuq evimizdə, təqaüdümüzü alırıq, dolanırıq. Teatrdan, Mədəniyyət Nazirliyindən maraqlanan olmayıb. Hərdən bayramlarda İcra Hakimiyyətindən yardım qutuları gətirirlər, vəssalam. Digər qurumlardan maraqlanan yoxdur”.

Mərhum aktrisanın anası deyir ki, Xanım Qafarovanın sənət yoldaşları əvəllər ondan xəbər alsalar da, indi zəng edən yoxdur:

“Sənət dostlarından da gəlib-gedən yoxdur. Onlar da aktyor, aktrisadırlar, özlərinin nə imkanı var ki, hələ bizə də nəsə eləsinlər?! Heç birindən də ummuram, Allah özü kömək olur, dolanırıq. Xanımın qızı da böyüyüb, artıq 14 yaşı var. Məktəbə gedir, yaxşı oxuyur. Bütün dərsləri ilə maraqlanır. O da anası kimi aktrisa olmaq istəyir, amma biz razı deyilik”.

Qeyd edək ki, Əməkdar artist Xanım Qafarova 2014-cü ildə, 47 yaşında xərçəng xəstəliyindən dünyasını dəyişib. Onun bir qız övladı - Gövhər yadigar qalıb.


Paylaş: