Vətən müharibəsində qəhrəmancasına döyüşərək ağır yaralanan tankçı, üçüncü qrup qazi Tərlan Abbasovun səhhətində ciddi problemlər var.

O, problemlərini Moderator.az-ın əməkdaşıyla söhbəti zamanı sadalayıb və “YAŞAT” Fondundan kömək istəyib:

“Artıq iyul ayından ordu sıralarından tərxis olundum. Mənə üçüncü qrup əllilik verdilər. Amma hələ ki, təqaüd kartımı almamışam və bununla bağlı bütün sənədlərimi təqdim etmişəm. İnşallah yaxın vaxtlarda kartımı verəcəklər.

44 günlük Vətən müharibəsi zamanı sentyabrın 27-də Füzuliyə girdik. Özüm sürücü-mexanikəm. Laçına qədər döyüşə-döyüşə getdik. Oktyabrın 9-da isə çox təəssüf ki, tankımız düşmən tərəfindən vuruldu. Bu zaman ağır yaralandım. Üç hərbçi yoldaşımla birlikdə yanan tankdan çıxdıq. Əllərim, başım, üzüm və gözlərim yanmışdı.

Qazi deyib ki, o, bir neçə aydır ki, müalicə alır, amma həkimlər deyib ki, qulağın təcili olaraq əməliyyat olunmalıdır:

“Hospitalda müalicələr aldıqdan sonra üzümdəki yanıq yerləri sağaldı. Həmin vaxt “YAŞAT” Fonduna müraciət etdim və mənə ilkin olaraq 2500 manat pul verib bildirdilər ki, bununla müalicəni və problemlərini həll elə, sonra yenə müraciət edərsən biz köməklik edərik. Mən də həmin pulu müalicəmə və evimin təmirinə xərclədim. Mart ayında isə üçüncü övladım dünyaya gəldi və akademik M.Mirqasımov adına Respublika Klinik Xəstəxanasının həkimləri heç qazi olduğumu belə nəzərə almadılar və dedilər ki, “bizim üçün döyüşməmisən ki”. Yəni mən onlara demişdim ki, qazi olduğumu nəzərə alıb xəstəxana xərclərində güzəşt etsinlər. Onda doğuş üçün 500 manat da həkimlərə pul verdim.

Amma indi sol gözüm görmür, sol qulağım isə eşitmir. Qulağımdan çirk gəlir. Bir müddət müalicə gedir, yaxşı oluram. Amma sonra yenə ağrılar başlayır. “Papanin” hospitalında həkimlər dedi ki, qulağın təcili əməliyyat olunub, pərdə qoyulmalıdır. Əgər gecikdirsən, başqa problemlər çıxacaq. Evimin də təmiri yarımçıq qaldı, pul çatmadı.

Sizin vasitəsinizlə “YAŞAT” Fonduna müraciət edərək onlardan qulağımın əməliyyatı və evimin təmiri üçün köməklik etmələrini xahiş edirəm”.

Redaksiyadan: Qeyd edək ki, Qazimizin müraciəti ilə bağlı Moderator.az-ın əməkdaşı YAŞAT Fondu ilə əlaqə saxlayıb. Fonddan bildiriblər ki, Tərlan Abbasov bu günədək müalicə üçün müraciət etməyib. Məsləhət gördülər ki, Qazimiz ən qısa zamanda Fonda müraciət etsin və operativ şəkildə onun müalicəsi üçün müvafiq tədbirlər görülsün.



Paylaş: