27 il erməni işğalından sonra artıq Zəngilan Vətənə qayıtdı. Şanlı Ordumuz qəhrəmanlıq göstərərək Zəngilan şəhərini və bir neçə kəndi bir il bundan əvvəl işğalçılardan azad etdi və beləliklə, 27 illik işğala son qoyuldu.

Oktyabr ayının 20-də Prezident İlham Əliyev və birinci xanım Mehriban Əliyeva Zəngilan rayonunda Ağalı kəndində həyata keçirilən “Ağıllı kənd” layihəsi çərçivəsində görülən işlərlə, Zəngilan Beynəlxalq Hava Limanının tikintisi ilə, Dövlət Sərhəd Xidmətinin Zəngilan rayonunda yerləşən hərbi hissə kompleksində yaradılan şəraitlə tanış olmaqla yanaşı, “Azərişıq” ASC-nin Zəngilan Rəqəmsal Yarımstansiyasının təməlqoyma mərasimində və “Azərenerji” ASC-nin “Zəngilan” yarımstansiyasının açılışında iştirak ediblər.

Zəngilan rayonuna növbəti səfərləri zamanı ölkə Prezidenti ictimaiyyət nümayəndələri ilə görüşündə qeyd edib ki, "böyük neft və qaz potensialına sahib, xam neft və neft məhsullarının, təbii qaz və elektrik enerjisi ixracatçısı olan Azərbaycan böyük məsuliyyət nümayiş etdirməli və “yaşıl enerji”yə fəal şəkildə sərmayə yatırmalıdır”. Zəngilanda "ağıllı kənd" layihəsi çərçivəsində 1-ci, 2-ci, 3-cü Ağalı kəndlərində müasir məktəb, bağça, poliklinika və elektron idarəetmə mərkəzləri inşa olunur, turizm infrastrukturu formalaşdırılır. Bütün yaşayış evləri, sosial obyektlər, inzibati və ictimai iaşə binaları, kənd təsərrüfatı məhsullarının emalı və istehsalı prosesi alternativ enerji mənbələri ilə təmin edilir.

Dövlətimizin başçısı azad edilmiş torpaqlarda bütün bərpa işlərinin ən yüksək səviyyədə təşkil olunacağını bildirərək bu ərazilərin cənnətməkana çevriləcəyini böyük qürur hissi ilə vurğulayır. Ölkə Prezidenti Zəngilan rayonuna səfərində də bu fikri xüsusi qeyd etmişdir ki, Zəngilanın yeni dövrü başlayır və şəhərin baş planı artıq hazırlanır. Yaxın aylarda baş plan təqdim ediləcək. Bütün təbii gözəlliklər nəzərə alınaraq müasir, çox gözəl şəhər, həmçinin kəndlər qurulacaq. Artıq turizm, kənd təsərrüfatı, nəqliyyat, logistika, ətraf mühitin qorunması, ümumilikdə insanların üçün şəraitin yaradılması istiqamətində işlər görülür. Zəngilan ölkə üzrə çox müasir və böyük əhəmiyyətə malik olan bölgəyə çevriləcək.

Ölkə Prezidentinin işğaldan azad edilmiş rayonlara səfərləri və bu səfərlər zamanı həmin ərazilərdə aparılan quruculuq işləri çərçivəsində inşa edilən yeni strateji obyekt və müəssisələrin təməlinin qoyulması artıq yeni həyatın başlanmasına, “Böyük Qayıdış”ın qısa zamanda gerçəkləşəcəyinə işarədir.

Sərvər Məmmədov
Zəngilan sakini, ehtiyatda olan polkovnik
DİA.AZ


Paylaş: