“Məhkəmə qərarı icraçıları bu işdə həmin ailəyə himayədarlıq edir. Nə icra baş idarəsinə zəng etmək, nə də qəbuluna düşmək olur”.

Bu sözləri Oğuz rayonundan ev və torpaq sahəsi alan şəxsin aldadılması ilə bağlı şikayətinin aidiyyatı qurumlar tərəfindən laqeyd yanaşılmasından şikayətçi olan müharibə veteranı Akif Mirsiyaboğlu Yenicag.az-a açıqlamasında deyib.

Müharibə veteranının sözlərinə görə, bir neçə il öncə Oğuz sakinindən mülk almaq üçün razılaşıb və 3000 manat dəyərində beh verib. Lakin evə sahib olmamaqla yanaşı, verdiyi behi də geri ala bilmir. Müvafiq qurumlar isə bu məsələni araşdırmaqdan boyun qaçırır:

“Özüm Xocalıdanam. Soyqırım zamanı atam, anam, Milli Ordunun zabitləri olan iki qardaşım, bacım və gəlinimiz şəhid olublar. 8 azyaşlı və 2 qadın himayəmdə olmaqla, əvvəl Ağdamda uşaq bağçasında yaşamışıq. Həmin bağça işğal olunandan sonra Bakıya köçmüşük. Müharibə zamanı kontuziya almışam, şəkər və ürək xəstəliyindən əziyyət çəkirəm. Bakıya köçəndən sonra öz vəsaitimlə Yeni Günəşlidə aldığım ikiotaqlı bina evində yaşayıram. Müharibə veteranı, məcburi köçkün və şəhid ailəsi kimi heç vaxt mənzil almaq üçün müraciət etməmişəm.

2017-cı ildə təqaüdə çıxdım. Həkimlər şəhərin səs-küyündən uzaq, təmiz havası olan bölgələrimizdən birində yaşamağın səhhətim üçün faydalı olacağını bildirdilər. Buna görə də Oğuz rayonunda yaşayan dostuma müraciət etdim. O, məni Xalxal kəndində yaşayan tanışı Əmirov Tərlan Abuzər oğlunun evinə apardı. Bu şəxslə 30 sot torpağı və evini 30000 manata almağım barədə razılaşdıq. Həmin şəxs məndən 3000 manat beh alaraq bir aya alqı-satqı edəcəyini bildirdi. Lakin bir ay tamam olsa da, Tərlan Əmirov zəbt etdiyi 14 sot bələdiyyə torpağına sənəd düzəltmədi. Əgər bu iş alınmırsa, verdiyim behin qaytarılmasını istədim. Bir il boyunca Oğuz-Bakı yolları arasında qalsam da, sənəd düzəlmədi və pulumu da qaytarmadı. Ona görə də məhkəməyə müraciət etdim. Məlum oldu ki, həmin şəxs 5 il öncə məni onlara aparan dostumdan da 2700 manatlıq tikinti materialı götürüb, lakin pulunu verməyib.

Müraciətimlə bağlı məhkəmə 6027 manat borcu qaytarması üçün qətnamə verdi, amma üç ildir ki, qətnamənin şərtinə də əməl olunmur. Qətnamənin qərarına görə, Əmirov Tərlanın adına olan 1 hektar torpaq sahəsi, 30 sot bağ və əmlakı siyahıya alınmalı, üzərinə həbs qoyulmalı idi. Təəssüf ki, məhkəmə qərarı icraçıları bu işdə həmin ailəyə himayədarlıq edir. Nə icra baş idarəsinə zəng etmək, nə də qəbuluna düşmək olur.

Hazırda Əmirov Tərlan ailəsi ilə birlikdə Bakıda yaşayır. O, Binəqədi şossesində yerləşən dəmir bazarında həm gözətçi, həm də elektrik qaynaqçısı işləyir. Lakin heç bir əmək müqaviləsi yoxdur. Ədliyyə Nazirliyinə müraciətimdən sonra icra məmurları hərəkətə keçdi. Tərlanın həbs qoyulan torpağının 3 sotunun hərraca çıxarılması və vəsaitin mənə ödənilməsi barədə qərar qəbul olundu. Həmin 3 sot torpağı alan olmadığı üçün borcumun 2880 manatı əvəzinə həmin torpaq mənə verildi. Hərrac sənədlərini alıb Qəbələ reyestr xidmətinə getdim. 130 manat ödəməklə mülkiyyət hüququ vermək əvəzinə, mənə payçı kimi sənəd verdilər. Deyildi ki, mülkiyyət hüququ üçün gərək yenidən məhkəməyə müraciət edim. Hazırda mənə mülkiyyət hüququ verilməsi üçün iş araşdırılır. Əmirovlar ailəsi isə telefonla məni ölümlə hədələyir ki, sənə torpaq verməyəcəyik. Əgər ayağın Xalxala dəysə, səni qəbirə göndərəcəyik.

Borcun qalan hissəsi, yəni 3150 manatın ödənilməsi üçün heç bir tədbir görülmür. Bir il əvvəl məndən işin 306-cı maddəsi ilə istintaqa göndərilməsinə etiraz etməməyimlə bağlı ərizə alınsa da, problem hələ də həll olunmayıb. Ölkə başçısına, Ədliyyə Nazirliyinə göndərdiyim teleqram və elektron müraciətlərin əksəriyyəti “Vətəndaşların müraciətinə baxılması haqqında” qanunun 7-ci maddəsinə zidd olaraq, şikayətçi olduğum orqana göndərilməyib və ört-basdır edilir. Bir ay 10 gün bundan əvvəl ölümlə təhdid edilməyimlə bağlı ərizəmə görə də araşdırma başlamayıb”.