“Azərsun” Holdingin prezidenti Abdulbari Gözəlin kürəkəninin qardaşı sahibkarlara 28 min manat, işçilərə isə 11 min manat pul verməli olduğu halda yoxa çıxıb.
Bu barədə elə sahibkarların özləri veriblər. Onlar deyirlər ki, “Azərsun” holdingin prezidenti Abdulbari Gözəlin kürəkəni Akın Konyar “Azərsun” Holdingə məxsus “İkra Lojistika” şirkətinin direktorudur.

Akın Konyarın qardaşı Fərdi Konyar isə “Azərsun” Lojistik mərkəzin ərazisində olan restoran və bağırsaq sexinin sahibidir. Sahibkarlar müxtəlif vaxtlarda onun bağırsaq sexinə bağırsaq təhvil verirmişlər. İlk əvvəl Fərdi Konyar onların ödənişlərini etsə də sonradan vədinə xilaf çıxıb və ödənişləri gecikdirib. Bu minvalla 8 nəfər sahibkara ümumilikdə 28.480 manat borclu qalıb. Eyni zamanda onun sexində çalışan 20 işçinin maaşları da 11.548 manat vəsait Fərdi Konyar tərəfindən ödənilməyib.

Əslən Türkiyə vətəndaşı olan Fərdi Konyar borcların ödənilməsi ilə bağlı həm işçilərə, həm də sahibkarlara möhürlü sənəd verərək borcu olduğunu və həmin borcun ya “Azərsun” holding tərəfindən ya da özü tərəfindən ödənilməli olduğunu təsdiqləyib. Verilən sənəd əsasında sahibkarlar borclarını “Azərsun” holdingdən istəsələr də onlara şirkətin adını hallandırmamaq və bu barədə bir daha şirkətə yaxınlaşmamaq tələbi qoyulub.

Fərdi Konyarı şəxsi əlaqələr hesabına axtarmağa çalışsalar da onu tapmağa müvəffəq olmayıblar. Sahibkarlar deyir ki, sonuncu dəfə onun səhhətində problemlər olduğu deyilsə də aqibəti haqqında heç bir məlumat verilməyib.

“Azərsun” holdinqsən bildirilib ki, onun vəkili Məzahir (soyadını təqdim etmədi) bəydir. Zəngimizi cavablayan Məzahir bəy isə Fərdi Konyarın vəkili olmadığını bu barədə onu narahat etməməyimizi bildirdi:

“Sizə kim məlumat veribsə səhv məlumat verib, mən Fərdi Konyarın vəkili deyiləm, xahiş edirəm məni bir daha bu məsələ ilə bağlı narahat etməyəsiniz”.

Xatırladaq ki, şikayətçi olan sahibkarlar məsələ ilə bağlı prokurorluğa, Daxili İşlər Nazirliyinə və şəxsin tapılması üçün Türkiyə Səfirliyinə müraciət ediblər.

Türkiyə vətəndaşı olan Fərdi Konyarın sahibkarlara eləcə də maaşlarını ödəmədiyi işçilərə verdiyi möhürlü sənədin fotoşəkillərini oxucularımıza təqdim edirik:
Bizimyol.info


Paylaş: