“Örüş sahəsinə yaxın düşə bilmirik. Dava-dalaş düşür, adamlar polisə çəkilir… Halbuki, Sovet hökuməti dağılandan sonra o sahələr əhalinin istifadəsinə verilmişdi. O sahələrdə hərə bir tərəfində mal-qarasını otarırdı. Ancaq 30 ildir ki, bir adam hamısını ələ keçirib. Kənd camaatı heyvanını otarmağa yer tapmır”.

Gədəbəyin Gərgər kəndinin əhalisi əsasən əkinçilik, maldarlıq, heyvandarlıqla məşğul olur. DİA.AZ bildirir ki, ancaq kənd sakinlərinin deməsinə görə, 30 ilə yaxındır ki, kənddəki otlaq sahələri zəbt olunub. Bu səbəbdən də əhalinin bir hissəsi heyvanını satıb, bir hissəsi isə tövlə şəraitində saxlamaq məcburiyyətindədir. Kənd sakinləri:

“Vaxtilə dövlətə ən çox ət, pendir verən kənd idi”

“Sovet dağılandan sonra kəndin bütün otlaq sahələri bir adamın əlində cəmləşib, o da heç kimin heyvanını otlaqlara buraxmır. 30 ildir ki, əhali heyvanını tövlədən kənara çıxara bilmir. Nəticədə vaxtilə heyvandarlığı ilə tanınan kəndimizdə bu məşğuliyyət tamamilə yox olub. Baxırsan ki, bizim kimi sadə bir kəndlidir, o da heyvandarlıqla məşğul olur, ancaq arxasında kim dayanırsa, kimə arxayındırsa, 30 ildir, bir adam otlaq sahəsinə yaxın düşə bilmir. Vaxtilə bu kənd dövlətə ən çox ət, pendir verən kənd olub. İndi heyvanlarımız təbii otlaq görmür, hava udmur”.

“100 hektar sahə bir adamın əlindədir”

Kəndlilərin deməsinə görə, Nüsrət adlı şəxs təxminən 100 hektar ərazini zəbt edib. Bu sahə uzun illərdir ki, bir adamın istifadəsindədir deyə, əhali otlaq sahələrinə yaxn düşə bilmir. Həmin şəxs minlərlə heyvanı orada otarır. Sahədə tez-tez mübahisə düşür, dava-dalaş səviyyəsinə çatır, polis müdaxilə edir, kəndliləri şöbəyə aparır. Bu səbəbdən də kəndlilər dövlət qurumlarına müraciət ediblər ki, münaqişə yaranmaması üçün məsələ dövlət səviyyəsində həllini tapsın. Ancaq illərdir ki, onların müraciətləri cavabsız qalır.


Paylaş: