""Baktelekom"un cavabının saxta , yalan olduğu elə cavabın özündən görünür. Telefon xidməti yalandan yazır ki, 2007-ci və 2008-ci ildə iki ayrı nömrəli telefon xətti çəkilib. Çəkilibsə, bunu təsdiq edən müqavilə Baktelekomda olmalıdır, niyə onu sübut kimi təqdim etmirlər? Mənim ilk nömrəm 1988-ci ildə 102 manat çəkiliş haqqı ilə gerçəkləşib. Niyə mediaya yalan məlumat verilir? Eyni zamanda kabelləşmiş binaya telefon nömrəsinə görə iki dəfə çəkiliş haqqı alınması hansı qərarda yazılıb? 2007-2008-ci illərdə, gərək ki, 2012-ci ilə kimi 2 manat olması da faktdır. Ən başlıcası, telefon abunə haqqının sahibkarlıqla məşğul olan Qarabağ qazilərinə 7.60 manat olması harda , hansı qanunda nəzərdə tutulub? Bir də bu telefon dəllalları necə müəyyən ediblər ki, yataq xəstəsi Qarabağ qazisi telefondan sahibkarlıq amacı ilə yararlanır? Və necə müəyyən ediblər ki, 2 nömrədən məhz biri "sahibkarlıqla məşğul olur"? "Əlillərin sosial müdafiəsi haqqında" (hazırda "Əlilliyi olan şəxslərin hüquqları haqqında" ) qanunun tələbinə görə isə , icra hakimiyyəti orqanları , digər qurumlar əlillərin istifadəsi , sahibkarlıq fəaliyyətinin təminatı üçün istifadələrində olan obyektləri , rabitə-nəqliyyat və s. qurğularını əlilliyi olan şəxslərin istifadəsinə verməyə borcludurlar. Bunu etməyənlərə sanksiya tətbiq edilməsi də qanunun tələbidir. Baktelekom dövlətin əlilliyi olan şəxslər haqqında siyasətinə eyni nömrəyə görə 2 dəfə çəkiliş haqqı , 2 manat əvəzinə 7.60 manat abunə haqqı almaqla "töhfə verir"? Hələ bir utanmadan mətbuata da "ritorik" yalanla korrupsiya xidmətini malalamaq yolunu tutub?"