Tovuzun Əyyublu kənd 1 saylı orta məktəb direktoru Cəmşid Sadıqovun texniki işçi Aygün Əliyevadan 2000 manat alaraq onu işə götürməsi iddiaları elektron mediada səs-küy doğurub. Cumhuriyyet.net-in əldə etdiyi xəbərə görə, təhsil ocağı müdirinin barəsində Baş Prokurorluq yanında Korrupsiyaya qarşı Mübarizə Baş İdarəsinə şikayət edilib.
Artıq C.Sadıqovun işi prokurorluqdadır və araşdırmanın icraatı ilə bağlı yaxın günlərdə hərəkətlənmə olacağı gözlənilir.
Məktəb direktorunun A.Əliyevadan və kollektivin digər işçilərindən hər ay 20 manat alması, A.Əliyevanın 110 manat almalı olduğu maaşı qanunsuz olaraq azaldıb 30 manata endirməsi iddiaları da prokurorluq tərəfindən araşdırıla bilər.
C.Sadıqovun şikayətləri qulaqardı etməsi, texniki işçini sıxışdırması, gözümçıxdıya salması, onun verdiyi 2000 manatı qaytarmaması ilə bağlı nə Tovuz təhsil şöbəsi, nə də Təhsil Nazirliyi tədbir gördü. Əksinə, C.Sadıqov A.Əliyevaya özündənrazı şəkildə bildirib ki, heç kim ona bata bilməz, şikayətlər vecinə deyil, çünki Bakıya gedib, nazirlikdə olub, məsələni “yoluna” qoyub.
Belə çıxır ki, məktəb direktoru nazirlikdən onu himayə edən şəxsi “görüb”, işin ört-basdır edilməsi üçün “şirinlik” verib.Lakin unudub ki, nazirlikdən daha səlahiyyətli qurum var – porkurorluq və iş orada ört-basdır edilə bilməz.
Aldığımız xəbərə görə, direktor prokurorluğa şikayətdən xəbər tutub, bundan acığa düşərək A.Əliyevanı növbəti dəfə təhqir edib, ondan qisas almaq naminə məktəbin döşəmələrini silməyə məcbur edib, işdən getməsi üçün tabelə qol çəkməsinə belə imkan verməyib. Bütün bunlar Tovuz rayon təhsilindəki rəzil mənzərəni, dərəbəyliyi, anarxiyanı ortaya qoyur. Görün təhsilin idarəçiliyi hansı səviyyəyə enib ki, bir kənd məktəbinin direktoru ilə bacarmırlar. Ya da bacarırlar, sadəcə, C.Sadıqovla əlbirdilər, hesablaşırlar.
Çünki Tovuz məktəblərinin əksəriyyətində özbaşınalıq, şahın qanun olması, tədrisin keyfiyyətinin aşağı düşməsi, dərsə davamiyyətin sıfıra enməsi, müəllimlərin incidilməsi, texniki işçilərin qul kimi işlədilməsi normativə çevrilib.
Ona görə də C.Sadıqov A.Əliyevanın şikayətlərinin nə nazirlikdə, nə yerli təhsil şöbəsində araşdırılacağına arxayındır.
Odur ki, aldığı 2000 manatı geri qaytarmır, texniki işçinin maaşını bərpa etmir. Bu azmış kimi, onu təhqir edir, qul kimi işlədir, hədələyir. Aygün xanım ayda cəmi 110 manat maaş almalıdır. Bu qəpik-quruşu da ona çox görən məktəb direktoru əsassız yerə pulunu kəsib, əvvəlcə 80, sonra 60, axırda 35 manata endirib. A.Əliyeva RTŞ-nə şikayət elədikdə pulu 30 manata çatdırıb.
İndisə prokurorluğa şikayət olunduğunu eşidib, əl-ayağa düşüb, Aygünü aşağılayıb, hədə-qorxu gəlməyə başlayıb. Deyib ki, nazirlikdə işini həll edib, haqq-hesab verib. Bu ittiham təhsil naziri Ceyhun Bayramova yönəlir.
Yəni, nazir o günə qalıb ki, kənd məktəbinin direktorundan rüşvət alsın, yaxud nazirlikdə onun regional kuratoru pul götürüb C.Sadıqovun əməllərini malalasın?! C.Bayramov islahatçı nazir imici qazanıb, təhsildə yeniliklərə imza atmağı hədəfləyib, neqativləri aradan qaldırmağa çalışır, özünü yaxşı aparmayan məktəb direktorlarını, təhsil şöbəsi müdirlərini cəzalandırmağa başlayıb.
Bu halda Tovuzun Əyyublu kənd məktəbi direktorunun ona iftira atması, imicini ləkələməsi, öz bəd əməlinə görə nazirliyin adını hallandırması yaxşı əlamət deyil. Tezliklə prokurorluqla yanaşı nazirlik də bu məsələyə qarışmalı, komissiya təşkil etməli, C.Sadıqovun fəaliyyəti təftiş olunmalı, A.Əliyevanın problemi həllini tapmalı, verdiyi 2000 manatın qaytarılması təmin edilməlidir. Əks təqdirdə, bu yazılanların müqabilində nazirliyin susması elə təəssürat oyadacaq ki, C.Bayramov biganədir, C.Sadıqovun böhtanları ilə razılaşır. Çünki susmaq razılıq əlamətidir və belə aydın olur ki, bir məktəb direktoru ilə də bacarmırlar.
A.Əliyeva isə bildirir ki, sonuna qədər mübarizəni davam etdirəcək, prokurorluğun araşdırmasından asılı olaraq, hüquqi müstəvidə addımlar atacaq. O, ailəsinə maaş aparmaq istəyir, dolanışığın çətin olduğunu söyləyir, 110 manata ciddi ehtiyac yarandığını deyir, C.Sadıqov isə onun balalarının pulunu kəsir, aldığı 2000 manatı da qaytarmır.
Xatırladaq ki, Aygün Əliyeva prezident İlham Əliyevə, I vitse-prezident Mehriban Əliyevaya, Baş prokuror Zakir Qaralova və təhsil naziri Ceyhun Bayramova müraciət edib.
A.Əliyeva müraciətində qeyd edib ki, Tovuz təhsil şöbəsindən Alik müəllim nümayəndə olaraq gəlib, ondan izahat yazmasını istəyib. Alik müəllim Aygünlə təkbətək söhbəti zamanı Cəmşid Sadıqov deyib ki, “Alik, onun izahatını yaxşı al, sənin “hörmətini” necə lazımdır edəcəyəm”.
Aygün isə izahat yazmaqdan imtina edib. Təhsil şöbəsinin nümayəndəsi gedər-getməz məktəb direktoru A.Əliyevanı, onun şikayət etdiyi medianı prokurorluqla, məhkəmə ilə təhdid edib: “Cəmşid Sadıqov 2015-ci ildə məni işə qəbul edib və buna görə 2000 manat alıb. O vaxt söz vermişdi ki, hər ay 110 manat maaş alacaqsan. Mən də gözümü o maaşa dikmişdim ki, dolanışığa xərcləyim. Çünki həmin 2000 manatı bankdan kredit götürüb vermişdim. Ancaq sonra pulu əsassız yerə kəsməyə başladı. Heç bir səbəb, izah göstərə bilmədi. Sonrakı ay 80 manat maaş verdi. Bu məbləğ getdikcə azaldı və axırda 30 manat ayda maaşverdi. Mən 2000 manat vermişəm ki, hər gün işə ayda 30 manat maaş üçün gəlim? Mən bu barədə mətbuata şikayət elədikdən sonra Cəmşid Sadıqov pulumu qaytarmaq, maaşımı bərpa eləmək əvəzinə, məni təhdid etdi. Dedi ki, səni korrupsiyaya qarşı mübarizə idarəsinə verəcəyəm. Oğru elə bağırır ki…”


Paylaş: