Azərbaycanda pensiyaçılara pensiya növünü seçmək hüququ veriləcək.

"Report"un xəbərinə görə, bu, "Əmək pensiyaları haqqında" qanuna dəyişiklik layihəsində əksini tapıb.

Belə ki, mövcud qanunvericiliyə görə, əlilliyə görə pensiya alanın yaşa görə pensiya almaq və yaxud yaşa görə pensiya alanın əlilliyə görə pensiya almaq hüququ yoxdur. Yəni pensiya növünün dəyişdirilməsi hazırda qanunda nəzərdə tutulmur, amma yeni tətbiq ediləcək qanunda bu qadağa aradan qaldırılacaq və vətəndaşın seçim imkanı yaranacaq ki, ya əlilliyə, ya da yaşa görə pensiya alsın.

Azərbaycanda pensiya yaşı ilə bağlı unifikasiya aparılacaq, yəni kişilərin və qadınların güzəştli şərtlərlə bəzi hallarda pensiya yaşı da bərabərləşdirilir.

Bunu Milli Məclisin Əmək və sosial siyasət komitəsinin sədri Musa Quliyev deyib.

O bildirib ki, bununla bağlı "Əmək pensiyaları haqqında" qanuna dəyişiklik təklif olunur: "Dəyişikliyə əsasən pensiyaya çıxmaq üçün şərtlər yumşaldılır".