Zaqatala rayon, Qımır kənd sakini çarəsiz qalıb. Hər iki ayağını itirmiş, üstəlik, ruhi xəstə olan Nəzər Nurulla oğlu Bəkirov bu günə qədər nə əlillik dərəcəsi ala bilir, nə də ona pensiya hüququ tanınıb. JAMAZ.İNFO xəbər verir ki, Nəzər Bəkirov bir müddət Ruhi-Əsəb Dispanserində saxlanılıb. Onun ruhi xəstə olduğu elə dispanser tərəfindən rəsmi olaraq təsdiqlənib. Lakin Qımır sakininin problemi bununla da bitməyib. Onun ayağında yaranmış döyənək sonradan mikrob düşməsi səbəbindən çirkləməyə başlayıb. Həkimlər infeksiya düşmüş yaranı sağalda bilmədiklərindən əvvəlcə ayağın birini kəsiblər. Daha sonra isə infeksiya ikinci ayağına da keçib və nəticədə onu da kəsiblər. Hal hazırda hər iki ayağından məhrum olmuş Nəzər Bədəlov yataq xəstəsidir.Nəzər Bədəlovun qardaşı Hikmət Bəkirov fəhlə adamdır. Gündəlik iş tapıb özünü və ailəsini güclə dolandırır. Bir tərəfdən də əlil və yataq xəstəsi olan qardaşına da baxmaq məcburiyyətindədir. O deyir ki, qardaşı Nəzər Bəkirovu aparmadığı instansiya qalmayıb. “Dəfələrlə Zaqatala Sosial Müdafiə Mərkəzinə aparmışam qardaşımı, sənədlərini təqdim etmişəm. Baxıblar və deyiblər ki, qardaşıma əlillik dərəcəsi düşmür. Ona müavinat və pensiya təyin olunması üçün də müraciət etmədiyim ünvan qalmayıb. Lakin hamısından eyni cavabı almışam, onlar da “yox” deyiblər. İndi iki ayağı olmayan, üstəlik, ruhi xəstə olan qardaşıma nə əlillik dərəcəsi ala bilirəm, nə də ona müavinat təyin etmirlər”.Hikmət Bəkirov qeyd edir ki, qardaşına ondan başqa baxan yoxdur. “Mən gündəlik dolanışığım üçün hər gün işə gedirəm. Fəhlə adamam. Ona baxa bilmirəm. Heç imkanım da çatmır. Bizim başqa kimsəmiz də yoxdur ki, qardaşıma baxıb, ona qulluq eləsin. Nəzərin heç doğru-düşgün əlillik arabası da yoxdur. Uzun illər əvvəl ona əlillik arabası veriblər, o da sınıq-salxaqdır. Orasını-burasını məftillə, iplə bağlamışıq ki, sınıb, dağılmasın”.


Paylaş: