“Vaxtilə PKK-çı Dilandan siyasət dərsi almış bizim dahi mütəfəkkirimiz Sərdar Cəlaloğlu gözlədiyim ittihamı səsləndirdi. Niyə gözlədiyim? Çünki qonşu ölkənin xüsusi xidmət orqanlarına aid bütün internet saytlarında bəndənizin FETÖ ilə bağlılığı barədə təbliğatın bütün vasitələrlə aparılması tapşırığı verilib və hər gün də ən azı 10 saytda yeri-gəldi gəlmədi, bu informasiya tirajlanır”.
“Yeni Sabah” xəbər verir ki, bunu Böyük Quruluş Partiyasının başqanı, millət vəkili Fazil Mustafa deyib. O, bildirib ki, bir zaman bu sifariş Türkiyədən də gəldi və yenə də media qurumlarında tirajlamağa çalışdılar.

“Nəticəsi o oldu ki, Azərbaycanın xüsusi xidmət orqanları da, dövlət rəsmiləri də bir daha əmin oldular ki, Fazil Mustafanın xarici ölkələrdəki heç bir səfirliklə, təriqətlə, siyasətçi ilə, pul kisəsinin sahibləri ilə hansısa bir əlaqəsi yoxdur, ola da bilməz və Azərbaycan dövlətinin maraqlarından kənar hansısa marağı olmamış və olmayacaqdır.

Və başqa ölkələrin, xarici qrupların maraqlarına xidmət etməyi Sərdar Cəlaloğludan fərqli olaraq şərəfsizlik hesab edir. Ona görə də fikirlərim qarşısında acizsinizsə, ağalarına deyin başqa böhtanlar icad etsinlər və sizi də çətin duruma salmasınlar.

Yazır ki, tapşırığı Fətulla Güləndən alır. Xub. Heç diqqət etmisənmi Sərdar bəy, Fətulla Gülən də sənin o taydakı ağaların kimi hər çıxışından sonra ağlayır və onlara bənzər ağlayır. Yəni onunla da kökünüz bir yerdən gəlir və tam əminəm ki, bu türk kökü deyil.

Mənim ümumilikdə Azərbaycandakı bütün türk məktəblərini müdafiə etməyim, FETÖ-nu müdafiə etmək deyil, Azərbaycanda türklüyün mövqeyinin zəifləməməsini müdafiə etməkdir.

Həm də israrla söylədim ki, bu məktəbləri, Qafqaz Universitetini Turan Yazqan vaqfına, yaxud Dəyanət vaqfına verməklə türk təhsilinin ölkədən getməsinin qarşısını almaq mümkündür. Məhz sənin kimi burnunun ucundan uzağı görməyənlərin səyi nəticəsində bu məktəblər bağlandı və rus məktəblərinə axın edənlərin sayı 30-40 faiz artı.

Bakıdakı Dəyanət Litseyində qəbul üçün 100 yerə 2000-ə yaxın sənədin verilməsi bu məktəblərə tələbatın nə qədər yüksək olduğunu göstərdi. Yəni anlaman lazım ki, bizim müzakirəyə çıxardığımız məsələ Azərbaycanın strateji seçimi ilə bağlı məsələdir, siz irançı zehniyyətin daşıyıcılarının gətirib bu hala saldığınız məmləkəti sağlam ideolloji təməl üzərində qurmamız bir zərurətdir.

Bu, hələ də oxuyub anlamadığın Həsən bəy Zərdabi, Rəsulzadə, Əhməd Ağaoğlu missiyasıdır və indiyədək onların görüşlərindən fərqli bir sözümüzü tapıb ortaya çıxara bilməzsiniz. Bir də maraqlıdır ki, Azərbaycanda ortada yeyib qıraqda gəzən Sərdar Cəlaloğlu kimi xüsusi tipajlar yəni ictimai simalar var ki, bunlar Türkiyəyə gedib oranın cəmiyyətinə xoş gəlmək üçün yeniçəri olurlar, Azərbaycana gəlib burada xoşa gəlmək üçün qızılbaş olurlar, deyəsən Özbəkistana da getsələr yaşılbaş olacaqlar.

Başınız varsa, müzakirələrdən qorxmayın, heç kimi və heç nəyi bütləşdirməyin, bu gün ürək damarımızın kirəcləşdiyi nöqtəni doğru tapıb təmizləməsək, 22-ci əsrdə də uydurulmuş dinimizlə, uydurulmuş tariximizlə yatıb durmağa məhkum olacağıq”.


Paylaş: