Babək rayon Nehrəm qəsəbəsindəki 3 saylı orta məktəbdə təmir-tikinti işləri zamanı baş verən pozuntuları səhifəmizdə işıqlandırdıqdan sonra FHN yoxlamalara başlayıb. Monitorinq zamanı digər ciddi pozuntularla yanaşı, bina tavanı betonunun standartlara uyğun olmadığı ortaya çıxıb. Bu səbəbdən təmir-tikinti işlərinin dayandırılması və yenidən layihələndirilməsi ilə bağlı qərar verilib.

Məktəbdəki təmir-tikinti işlərinin gecikdirilməsi ilə bağlı bir neçə gün öncə ”Gündəlik Naxçıvan” səhifəsi məlumat vermişdi. Buna səbəb kimi tikinti üçün ayrılan pulların təyinatı üzrə xərclənmədiyi göstərilirdi.

Dövlət Tikintidə Təhlükəsizliyə Nəzarət İdarəsinin əməkdaşı Həbib Kərimov Naxçıvan Televiziyasına müsahibəsində bildirib ki, binanın gələcəkdə təhlükəsiz istifadəsi üçün qabaqlayıcı tədbirlər görülməli, bərpa-gücləndirmə işləri aparılmalıdır:

“Bura seysmik ərazi olduğundan, tikilən binaların uzunluğu maksimum 60 metr olmalıdır. Buradaisə, standartlardan 10 metr artıq, 70 metrdir. Bu uzunluqda binanın dam örtüyü tavanının qalınlığı munimum 170 mm. olmalıdır. Yoxlamalar zamanı isə bəlli olub ki, tavanın qalınlığı 15 mm azdır. Bundan əlavə, məktəbin binası düzgün layihələndirilməyib, fövqəladə hallar üçün çıxışlar qoyulmayıb”.

O bildirib ki, nöqsanlar barədə tikintinin sifarişçisi və podratçısı da məlumatlandırılıb.

922 şagird yerlik məktəb 2021-ci ilin ortalarından təmir adı ilə bağlanıb. 2022-ci il martın 31-də təmir zamanı binanın divarlarından biri çöküb. Qəza nəticəsində 3 fəhlə həlak olub, biri isə yaralanmışdı. Qəzaya səbəb, təmirə ayrılan vəsaitin mənimsənilməsi göstərilirdi. Qəzadan sonra binanda köklü təmir-tikinti işlərinə başlanılmışdı.

Mənbə: ”Gündəlik Naxçıvan”

Təqdim etdi: DİA.AZ (Ərsoyun Bloqu)